Qazaqstan astyǵy Ortalyq Azııa men Aýǵanstanǵa úzdiksiz jetkiziletin boldy
ASTANA. KAZINFORM — Qabyldanǵan sheshimder logıstıkalyq tizbekterdi turaqtandyrýǵa jáne qazaqstandyq astyqty Ózbekstan naryǵyna, sondaı-aq óńirdiń ózge de elderine ýaqytyly jetkizýge múmkindik beredi.
«QTJ» UK» AQ basqarma tóraǵasy men Aýyl sharýashylyǵy birinshi vıtse-mınıstri E. Kenjehanuly bastaǵan qazaqstandyq delegatsııanyń sapary aıasynda «Saryaǵash» memleketaralyq temirjol túıisý pýnktinde jáne Tashkent qalasynda Ózbekstan Respýblıkasynyń ýákiletti organdarymen kópjaqty kezdesý ótti.
Kelissózge Ózbekstan Respýblıkasynyń Kólik mınıstri Makkamov I.R., Aýyl sharýashylyǵy mınıstriniń orynbasary ıÝldashev Q.A., «Ýzbekıston temır ıýlları» basshysy Narzýllaev Z.G., sondaı-aq Mınıstrler kabıneti ókilderi qatysty.
Kelissózder barysynda taraptar «Saryaǵash» MTTP arqyly astyq ónimderin Ortalyq Azııaǵa jáne Aýǵanstan baǵyty boıynsha úzdiksiz tasymaldaýdy qamtamasyz etýge qatysty birlesken sheshimderge keldi.
Kezdesý qorytyndysy boıynsha táýligine poıyz almasý kólemin 35 jupqa deıin arttyrýǵa, sondaı-aq ózbek tarapymen táýligine keminde 10 astyq tıelgen quramdy jáne 5 jabyq vagondaǵy azyq-túlik taýarlaryn qabyldap otyrýǵa ýaǵdalasty.
Sonymen qatar, taraptar vagon aınalymyn qamtamasyz etý maqsatynda júk túsirý jumystarynyń, kirme joldar qyzmetiniń jáne ýákiletti organdardyń demalys jáne mereke kúnderin qosa alǵanda táýlik boıy jumys isteýiniń mańyzdylyǵyn atap ótti.
Budan bólek, júk tıeý jáne túsirý tepe-teńdigin saqtaý maqsatynda astyq tasymaly eksportyn Ózbekstan aýmaǵyndaǵy qabyldaýshy kásiporyndardyń bos qýattaryn eskere otyryp josparlaý, sondaı-aq bos vagondardyń kelisilgen aınalymyn qamtamasyz etý jóninde kelisimge qol jetkizildi.
Qabyldanǵan sheshimder logıstıkalyq tizbekterdi turaqtandyrýǵa jáne qazaqstandyq astyqty Ózbekstan naryǵyna, sondaı-aq óńirdiń ózge de elderine ýaqytyly jetkizýge múmkindik beredi.
Osy jyldyń 11 aıynda Qazaqstan men Ózbekstan arasyndaǵy júk tasymaly kólemi 28,5 mln tonna bolyp, ótken jyldyń sáıkes kezeńimen salystyrǵanda 4 mln tonnaǵa nemese 16%-ǵa artty.
Onyń ishinde astyq tasymaly aıtarlyqtaı ósim kórsetip, 32%-ǵa artty jáne 5,6 mln tonna boldy.
Aıta ketelik Qazaqstan men Ózbekstan astyq logıstıkasyn birlesip rettemek.