Qazaqstan astyǵy nege Qytaı shekarasynan óte almaı jatyr

ASTANA. KAZINFORM – Aýyl sharýashylyǵy mınıstri Aıdarbek Saparov Úkimet otyrysynan keıin ótip jatqan baspasóz máslıhatynda Qytaı shekarasynda qańtarylyp turǵan qazaqstandyq vagondar týraly túsinikteme berdi.

- Árıne búkil eksportty baqylaýda ustap otyrmyz. Tek Qytaı emes, 45 memleketke bıdaıymyz eksporttalady. Qytaı boıynsha problema bar. Tıisti komıtettiń adamdaryn ol jaqqa jiberdim. Qazir jumys júrgizilip jatyr. Bizdiń jaqtan búkil másele sheshilgen. Ar jaǵynda Qytaı tarapy búkil astyqty tekserý kerek. Buryn 10 vagonnyń birin ǵana degen sııaqty iriktep qana tekserse, qazir ár vagonnan synama alyp tekserip jatyr. Sondyqtan keshigý bar. Qazir sondaǵy bas keden basqarmasynyń basshylyǵymen kelisim jasap, tezirek sheshýdi josparlap otyrmyn, - dedi mınıstr.

Al Agroónerkásiptik keshendegi memlekettik ınspektsııa komıtetiniń tóraǵasy Sáken Qanybekov astyq tıegen vagondar Qazaqstan aýmaǵynda emes, Qytaı shekarasynda  turǵanyn naqtylady.

- Óz tarapymyzdan qujattyń bárin bergenbiz. Birinshi tranzıtpen kele jatqan astyq ótip, odan keıin ǵana Qazaqstan astyǵy ótedi degen áńgime joq. Jaqynda ǵana Qytaı jaǵyna mınıstr atynan hat joldadyq. Osy aıdyń ishinde kezdesý bolady. Sol kezdesýde «QTJ» ókilderi men bizdiń komıtet ókilderi sol máseleni tolyq sheshýge yqpal jasaımyz. Jyl saıyn osylaı bolady, bıyl ǵana emes. Qytaı jaǵyndaǵy fıtosanıtarııalyq beketter óte qatal qarap jatyr. Ár vagondy jeke-jeke qaraǵannan osyndaı ahýal týyndap otyr. Biz jaqtan da osyndaı qatań tekserý júrip jatyr, - dedi Agroónerkásiptik keshendegi memlekettik ınspektsııa komıtetiniń tóraǵasy Sáken Qanybekov.

Buǵan deıin Qazaqstan-Qytaı shekarasyndaǵy avtokólik ótkizý pýnktteri ýaqytsha jabylyp jatqanyn jazǵan edik.