Qazaqstan astyǵy endi Mysyr jáne Arab elderine eksporttalady

ASTANA. KAZINFORM – Elimizdiń astyǵy Mysyr jáne Arab elderine eksporttalýy múmkin. Bul týraly QR AShM basshysy Aıdarbek Saparov aıtty. 

— Byltyr 26,8 mln tonna astyq jınaldy. Búgingi kúni onyń bári elovatorlarǵa kirgizilgen. Onyń 8,2 mln tonnasy tasymaldandy. Sonyń 4,8 mln tonnasy eksportqa shyqty. Bul jumys ary qaraı jalǵasýda. Jańa naryqtar ashylyp jatyr, Reseı arqyly da, Baltyq elderi arqyly da eksportty júzege asyryp jatyrmyz. Qosymsha, Mysyr, Arab elderiniń naryǵyna shyǵamyz dep josparlap otyrmyz. Tıisti kelisimshart jasasýǵa 17-si kúni (aqpannyń — red.) sol jaqqa saparǵa shyǵamyz, - dedi mınıstr.

Vedomstvo basshysy el qambalarynda áli de mol astyq qory bar ekenin atap ótti.

— 20 mln tonnaǵa jýyq astyq bar. Onyń 12 mln-yn eksporttaý kerek. Atap ótkenimdeı, 4,8 mln-y eksporttaldy. Bul jumystar jalǵasady, - dedi ol.

Budan bólek ol astyqtar dıirmenderge un óndirýge, sondaı-aq maldyń azyǵy retinde qoldanýǵa da jiberilip jatqanyn atap ótti.

Aıta keteıik, elimizde bıdaı egý azaıyp, rentabeldiligi joǵary daqyldar aýmaǵy arttyrylyp jatyr. 

Sondaı-aq aýyl sharýashylyǵy kásipkerlerine jeńildetilgen lızıngke qarjy bólý qashan bastalatynyn jazǵan edik.