Qazaqstan astyǵy Batys Eýropa men Soltústik Afrıkaǵa eksporttalady

ASTANA. KAZINFORM — Premer-mınıstrdiń orynbasary Serik Jumanǵarın Qazaqstan astyǵy qaı elderge eksporttalatynyn túsindirdi.

Búgin Parlament Májilisinde bıylǵy astyqty ótkizý máselesin talqylaý kezinde depýtattar eksport arnasyn keńeıtý úshin naqty qandaı jumystar atqarylyp jatqanyn surady. 

Óz kezeginde «Azyq-túlik kelisimshart korporatsııasy» UK» AQ Basqarma tóraǵasy Asylhan Djývashev qazir 20 mln dollarǵa 5 shart bekitilgenin aıtty.

«Biz naryqtan alamyz, fermerge tikeleı kontrakt usynamyz. Eshbir komıssııasyz ári aqysyz túrde fermerlerge naryqqa shyǵýǵa kómektesemiz. Qazir biz qosymsha 100 myń tonnaǵa Tájikstan kompanııasymen shart bekitemiz. Meniń oıymsha, syrtqy naryqta básekege qabiletti bolý úshin kólik shyǵyndaryn sýbsıdııalaý kerek. Naryqty kúsheıtý úshin astyqty syrtqa shyǵarý qajet. Al astyqty molynan shyǵarý turǵysynda eksporttyq sýbsıdııany qarastyrǵan jón», - dedi A. Djývashev.

Onyń aıtýynsha, qazir Qyrǵyzstan, Qytaı, Tájikstan kelissózder bekitilgenin, sondaı-aq endi Aýǵanstanmen bolady. Osy elderge bir aıda 250 myń tonna astyq shyǵarylady.

Sonymen qatar Premer-mınıstrdiń orynbasary Serik Jumanǵarın Batys Eýropa men Soltústik Afrıkaǵa shamamen 1,5-2 mln tonna astyq ketetinin naqtylady.

«Batys Aýǵanstan men Shyǵys Iranǵa 1,5-2 mln tonna astyq jóneltiledi. Bizdiń dástúrli túrde jetkiziletin Ortalyq Azııaǵa, kórshiles elderge 6-8 mln tonna ketedi. Máselen, Ózbekstanǵa baryp keldim, 3,5 mln tonna jiberýge kelistik. Buryn Qyrǵyzstan 500 myń tonna alatyn, keıingi kezderi ala almaı júr. Biraq birtindep alýdy bastap jatyr. Qazir jaqsy alyp jatyr. Qytaıǵa 2 mln tonna jiberemiz. Biraq jańa marshrýtattar bar... Biz jyldyń basynda Iran naryǵyna qaıtadan keldik. Ol jaqqa aparmaǵanymyzǵa 3-4 jyl boldy. Keler jyldyń basynda Sıntszıanda (Qytaı) kezdesý bolady. Ol jaqqa ózim baramyn. Gongonktyń basshysy men SÝAR-dyń (Shyńjań-Uıǵyr avtonomııalyq aýdany) basshysy bolady. Úsheýmiz osy taqyrypty talqylaımyz. Gonkong pen Vetnamǵa (bıdaıdy) aparatyn josparlarymyz bar, konteınerler arqyly jetkizemiz», - dedi Úkimet basshysynyń orynbasary.

S. Jumanǵarın sózine qaraǵanda, 2 mln 100 myń tonna astyq 2 aıda eksportqa shyǵarylǵan. Osyndaı tendentsııa bola berse, bolashaqqa 12 mln tonna eksportqa baǵyttaımyz.