Qazaqstan astanasy tyń jerdiń marjanyna aınaldy – Stanıslav Zas

ALMATY. QazAqparat – Ujymdyq qaýipsizdik týraly shart uıymynyń Bas hatshysy Stanıslav Zas «Nursultan Nazarbaev: Jahandyq aýqymdaǵy saıasatker» atty halyqaralyq konferentsııada Qazaqstannyń jáne Elbasynyń aımaq qaýipsizdigin qamtamasyz etýdegi mańyzdy róli týraly aıtyp berdi, dep habarlaıdy QazAqparat tilshisi.

«Sizderdiń elderińiz búginde Ortalyq Azııada kósh bastap tur, osy aımaqtyń qaýipsizdigin qamtamasyz etýde mańyzdy ról atqarady. Respýblıka kóptegen sátti reformalardyń úlgisi retinde tanyldy. Elde áleýmettik kelisim, tarıhı jáne mádenı dástúrler saqtalýda. Nursultan Ábishuly Nazarbaevtyń 30 jyldyq kóshbasshylyǵy boıyna Qazaqstannyń jalpy ishki ónimi 6 eseden joǵary ósti. Azamattardyń ál-aýqaty da jaqsardy. Osynyń bári Qazaqstan halqynynyń jetistigi jáne kóbine ol elderińizdiń Tuńǵysh Prezıdentiniń eńbegi»,– dedi Stanıslav Zas.

Sonymen qatar, ol Nur-Sultan qalasy ómir súrýge qolaıly shahar ekenin tilge tıek etti.

« Men Qazaqstanyń astanasynda birneshe ret boldym. Búginde bul qazaqstandyqtar ómir súrýge umtylatyn óte ádemi, zamanaýı, jaıly, jyldam ósip kele jatqan megapolıs. 1994 jyly osy saıyn daladaǵy orasan kúrdeli qurylystyń sátti bolashaǵyna kóp adam sene qoıǵan joq. Búgingi tańda Qazaqstan Respýblıkasynyń astanasy tyń jerdiń marjanyna aınaldy, jáne bul marjannyń atyn qazaqstandyqtar – Nur-Sultan dep beker qoımaǵan. Kózi kórgenderdiń, osy jerde turǵylyqty turǵyndarynyń aıtýynsha, keı kezde qys aıazy 50 gradýsqa deıin jetetin bul baıtaq dala qazirde áldeqaıda jylyna túsken», - dedi S. Zas.

Uıym basshysy qaýipsizdik júıesindegi ózgeristerge jeke toqtaldy.

«Búginde Qazaqstan Respýblıkasynyń Tuńǵysh Prezıdentiniń arqasynda, Ujymdyq qaýipsizdik týraly shart uıymy Eýrazııa keńistiginde qaýipsizdikti qamtamasyz etetin halyqaralyq, kópfýnktsıonaldy, aımaqtyq saıası qurylym retinde qalyptasty. Onyń saıası bedeli uıymnyń damý isine budan bylaı da qyzmet etetinine senimdimin», - dedi Stanıslav Zas.