Qazaqstan astanasy Dúnıejúzilik toqyma toqý kúnin merekeleýge qatysady
NUR-SULTAN. QazAqparat - 16 maýsymda elordalyq Ortalyq saıabaqta Halyqaralyq toqý kúnine oraılastyrylǵan festıval ótedi. Nur-Sultan qalasy 2005 jyly Parıjde bastaý alǵan sharaǵa ekinshi ret atsalyspaq, dep habarlaıdy Nur-Sultan qalasynyń mádenıet jáne sport basqarmasy.
Búginde atalmysh shara álemniń kóptegen memleketterinde jyl saıyn atalyp ótedi. Toqýmen aınalysatyn adamdarǵa qoldaý kórsetýge baǵyttalǵan shara Nur-Sultan qalasynyń Mádenıet jáne sport qalasynyń basqarmasymen uıymdastyrylady jáne pıknık túrinde ótedi. Ótkizý ýaqyty - saǵat 15:00-18:00.
Festıvalge bizben jáne ilgekpen toqı alatyn, toqýdy úırengisi keletin elorda turǵyndary men qonaqtary shaqyrylady. Toqý ónerin endi ǵana meńgeretin jandar úshin toqý, ıirý jáne kıiz basýdan tegin sheberlik sabaqtary uıymdastyrylady. Shara balalar úshin de, eresekter úshin de birdeı qyzyqty bolady.
Budan basqa, shara barysynda qonaqtar ashyq aspan astynda ótetin ıoga jáne samba-jumping sabaqtaryna qatysa alady. Alańda kitap oqýǵa qumar jandar úshin átkenshekter ornatylady, selfı jasaýǵa arnalǵan aımaqtar jasalady, túrli konkýrstar men kontserttik baǵdarlama ótkiziledi.
Sharaǵa múmkindigi shekteýli jandardy jáne psıhoáleýmettik damýy buzylǵandardy tartýǵa basa nazar aýdarylady. Festıvaldiń negizin qalaýshy Rahıma Mýkýshevanyń «Bergen» sheberhanasynda búginde 14 adam eńbek etedi, onyń ishinde 11-i - halyqtyń áleýmettik osal toptaryna jatady. Toqý arqyly olar aqsha taýyp, nıettes adamdarmen qarym-qatynas ornatady. Qolóner terapııa ispetti adamnyń janyn tynyshtandyryp, qıyndyqtardy eńserýge kómektesedi.
Aıta keteıik, Toqý festıvaline qatysýshylar qaıyrymdylyq sharaǵa da úles qosady. Olar merziminen buryn týǵan sábılerge kıim toqıdy jáne óz qoldarymen jasaǵan buıymdaryn onkologııalyq aýrýlarǵa shaldyqqan balalarǵa tartý ete alady. Sheberlik synyptary barysynda qolónershiler ólshemi 15*15 sm quraıtyn túrli tústi sharshylar toqyp, olardy bir-birine qosyp, úlken jamylǵylar jasaıdy. Bul buıymdar da perzenthanalarǵa tabystalady.
Adamdar kóp ýaqytyn planshet pen kompıýterdiń aldynda ótkizetin bul zamanda toqý festıvali syndy sharalardyń áleýmettik mańyzdylyǵy óte zor. Oǵan qatysýshylar toqýdyń negizgi daǵdylaryn meńgerip, ony ary qaraı damyta alady. Kópshilik aldynda toqý AQSh, Anglııa, Frantsııa, Shvetsııa, Fınlıandııa, Norvegııa, Estonııa jáne basqa da memleketterde keńinen nasıhattalady.
