Qazaqstan astanasy álemdik velosporttan alǵashqy ret joǵary deńgeıdegi jarys uıymdastyrady
TANA. 13 qazan. QazAqparat /Aıdar Ospanalıev/ - Qazaqstanda qarashanyń 4-6 aralyǵynda velotrekten Álem kýbogynyń alǵashqy kezeńi ótedi. Qazaqstan astanasy álemdik velosporttan joǵary deńgeıdegi jarysty alǵash ret ótkizgeli otyr. Bul týraly búgin elordada ótken osy kýboktiń tanystyrylymynda málim boldy.
Qazaqstan velosporty federatsııasynyń vıtse-prezıdenti Allen Sháıjúnisovtyń aıtýynsha, Astanada álem kýbogynyń alǵashqy kezeńi ótedi. Básekeniń ekinshi kezeńi Kolýmbııanyń Kalı qalasynda ótedi. Al qańtar aıynda jarystyń kezekti kezeńin Beıjiń kútip alady. Jarys 2012 jyldyń aqpan aıynda Londonda aıaqtalady. 14 qazanda jarysqa qatysýshylardan ótinish qabyldaý merzimi bitedi. Ázirge Álem kýbogynyń elordada ótetin kezeńine 22 kásibı trekshiler komandasy, 43 qurama komanda ótinish berdi. Barlyǵy 350 shabandoz. Jalpy, jarysqa 450-ge jýyq sportshy qatysady dep kútilýde.
«Qazaqstan onda 4 adamnan turatyn eki komandamen qatysady. Olar ulttyq qurama men elordalyq Astana Trek Team komandalary. Bul komandalardyń quramyn jasaqtaý qorytyndylary keıinirek jarııa etiledi. Al ázirge short-lıstke 9 shabandoz kirgendigi belgili. Olar: Alekseı Lılko, Dıas Ómirzaqov, Berik Kópeshov, Artem Zaharov, Sergeı Kýzın, Matveı Nıkıtın, Pavel Gatskıı, Sultanmurat Miralıev jáne Nıkolaı Ivanov»,-dedi federatsııa vıtse-prezıdenti.
Esterińizge sala keteıik, sport básekeleri «Saryarqa» jańa respýblıkalyq velotreginde ótedi. Jarysta 24 medal sarapqa salynady. Sport delegatsııalary elimizge qazan aıynyń sońyna taman kele bastaıdy. 1 qarashadan bastap, resmı jattyǵýlar bastalady. Jarystyń ashylý rásimi 4-shi qarashada ótedi.
