Qazaqstan Astanada kúres túrlerinen álem chempıonatyn ótkizýge daıyndalyp jatyr
ASTANA. KAZINFORM- Qazaqstannyń Týrızm jáne sport mınıstri Erbol Myrzabosynov Astanadaǵy Prezıdent ortalyǵynda ótip jatqan Birikken álemdik kúres uıymynyń (UWW) kezekti kongresinde quttyqtaý sóz sóıledi, dep habarlaıdy mınıstrliktiń baspasóz qyzmeti.
Jıynǵa halyqaralyq uıymnyń basshylyǵy men ulttyq federatsııalardyń delegattary qatysty. Mınıstr Qazaqstanda kongrestiń ótýi halyqaralyq sport qoǵamdastyǵynyń elge degen seniminiń belgisi ekenin atap ótip, aldaǵy álem chempıonatyn joǵary deńgeıde ótkizýge kúsh salynatynyn aıtty.
Erbol Myrzabosynov óz sózinde kúrestiń qazaq halqy úshin aıryqsha mańyzyna jáne óskeleń urpaqty tárbıeleýdegi róline toqtaldy.
-Kúres – halqymyzdyń mádenıetinde tamyry tereń ári baı dástúri bar sport túri. Ol tózimdilikti, sabyrlyqty jáne qarsylasqa degen qurmetke tárbıeleıdi. Qazaq palýandarynyń jetistikteri – elimizdiń maqtanyshy ári jas sportshylarǵa úlgi. Biz kúresti damytýǵa jáne halyqaralyq yntymaqtastyqty nyǵaıtýǵa erekshe nazar aýdaramyz, – dedi Erbol Myrzabosynov.
Mınıstr aldaǵy álem chempıonatyn ótkizý máselesine de toqtalyp, UWW prezıdenti Nenad Lalovıchke, uıym basshylyǵy men ulttyq federatsııalarǵa kórsetken senimi men qoldaýy úshin alǵysyn bildirdi.
-Erteń Astanada kúres túrlerinen álem chempıonaty bastalady. Qazaqstan úshin bul – úlken jaýapkershilik. Biz álemniń eń myqty palýandaryn laıyqty qarsy alyp, jarysty joǵary deńgeıde ótkizý úshin bar kúshimizdi salamyz, – dedi mınıstr.
Kongrestiń kún tártibine UWW prezıdenti men Bıýro múshelerin saılaý, uıymnyń 2024–2026 jyldardaǵy qyzmetiniń qorytyndysyn shyǵarý, qarjy esebi, tóreshiler máselesi, 2028 jylǵy Los-Andjeles Olımpıadasyna daıyndyq jáne irikteý júıesi engizilgen.
Kongrestiń basty taqyryptarynyń biri – Halyqaralyq kúres federatsııasynyń 2026–2032 jyldarǵa arnalǵan jańa strategııasy. Onda jastar men mektep sportyn damytý, áıelder kúresiniń múmkindikterin keńeıtý, bilim berý baǵdarlamalaryn jetildirý, marketıng pen kommertsııa baǵytyn kúsheıtý, sondaı-aq basqarý tıimdiligin arttyrý qarastyrylǵan.
Aıta keteıik, eresekter arasyndaǵy grek-rım, erkin jáne áıelder kúresinen álem chempıonaty 24 qazan men 1 qarasha aralyǵynda ótedi.
Osyǵan deıin kúresten Astanadaǵy álem chempıonatynda el namysyn qorǵaıtyn sportshylardyń tizimi jarııalandy.
