Qazaqstan áskerinde sarbazdar pikiri negizinde komandırler reıtıngi jasaldy

Bastama áskerı ujymdarda qolaıly ahýal jasaýdaǵy ofıtserlerdiń rólin arttyrýǵa, komandırler men jeke quram arasyndaǵy senimdi nyǵaıtýǵa, sondaı-aq áskerı qyzmetshilermen ozyq jumys tájirıbelerin taratýǵa baǵyttalǵan.

Armııa úıinde ótken III respýblıkalyq sarbaz analary forýmy áskerı-patrıottyq tárbıe men merzimdi áskerı qyzmetshilermen júrgiziletin jumystyń ózekti máselelerin talqylaý alańyna aınaldy.

Іs-shara 28 gvardııashy-panfılovshylar saıabaǵyndaǵy Máńgilik alaýǵa gúl shoqtaryn qoıý rásiminen bastaldy. Qatysýshylar qaza tapqan batyrlardy bir mınýt únsizdikpen eske aldy.

Qoǵamdyq dıalogqa Qorǵanys mınıstriniń tárbıe jáne ıdeologııalyq jumys jónindegi orynbasary general-maıor Asqar Mustabekov qatysty. Ol bul kezdesý memlekettik organdar men qoǵamdyq uıymdar arasynda tájirıbe almasýǵa, ózara is-árekettiń jańa tetikterin izdeýge jáne áskerı-patrıottyq tárbıeni ilgeriletýge baǵyttalǵan usynystar ázirleýge yqpal etetinine senim bildirdi.

Bul forým Qarýly kúshter, Ulttyq ulan, UQK Shekara qyzmeti, Tótenshe jaǵdaılar mınıstrligi, áskerı prokýratýra organdary, qoǵamdyq uıymdar men buqaralyq aqparat quraldarynyń ókilderin biriktirgen ashyq dıalog alańyna aınaldy.

Qorǵanys mınıstriniń keńesshisi Aıgerim Aǵyltaeva óz sózinde syndarly dıalogty damytý arqyly áskerdiń oń ımıdjin nyǵaıtýdyń mańyzyn atap ótti. Onyń pikirinshe, problemalyq máselelerdi atqarýshy organdarmen, bilim berý jáne densaýlyq saqtaý uıymdarymen qosa, ata-analar qaýymdastyǵymen birlesip qarastyryp, olardy sheshý joldaryn birge izdeý qajet.

Áskerge shaqyrý naýqanyn uıymdastyrý, áskerı-patrıottyq tárbıe berý jáne sarbazdardyń otbasylarymen ózara is-qımyl jasaý tájirıbesimen memlekettik organdar men kúshtik qurylymdardyń ókilderi bólisti.

Kezdesýge qatysýshylar komandırlerdiń tártipti saqtaý, moraldyq-psıhologııalyq ahýaldy qamtamasyz etý jáne áskerı ujymdardyń birligin nyǵaıtýdaǵy róli men jaýapkershiligine erekshe nazar aýdardy.

«Analar júregi» sarbaz analary komıtetiniń tóraıymy Lılııa Haırýllına forýmnyń «Patrıotızm men Otanǵa degen súıispenshilik – árbir komandırdiń mindeti» dep atalýy kezdeısoq emes ekenin atap ótti.

– Bıyl merzimdi áskerı qyzmetshiler arasynda saýalnama júrgizdik. Nátıjesinde sarbazdar qurmetteıtin ári joǵary baǵalaıtyn komandırler anyqtaldy, – dedi ol.

Lılııa Haırýllınanyń sózinshe, bul reıtıng úzdik ofıtserler tizimi ǵana emes, sonymen qatar jeke quramnyń komandırlerge degen senim deńgeıin jáne bólimshelerde qolaıly jaǵdaı jasaý jolyndaǵy kúndelikti eńbegin kórsetedi.

Moraldyq-psıhologııalyq ahýaldy nyǵaıtýǵa qosqan úlesi, qolastyndaǵylarǵa degen qamqorlyǵy jáne sarbazdardyń senimine ıe bolǵan úzdik komandırlerge «Analar júregi» sarbaz analary komıtetiniń alǵys hattary tabystaldy.

Іs-shara sońy Qarýly kúshter Ulttyq áskerı-patrıottyq ortalyǵynyń, Ulttyq ulannyń jáne UQK Shekara qyzmetiniń shyǵarmashylyq ujymdary daıyndaǵan kontserttik baǵdarlamamen aıaqtaldy.

Buǵan deıin áskerı-medıtsınalyq qyzmet kórsetý erejeleri ózgergenin habarlaǵanbyz.