Qazaqstan áskeriniń jaýyngerlik daıarlyq baǵdarlamasyna ózgerister engizilýde

NUR-SULTAN. QazAqparat - Qazaqstannyń Qarýly kúshterinde rotalar men batareıalardy jaýyngerlik úılestirý kezeńi bastaldy. Onyń sońǵy kezeńi rotalyq taktıkalyq oqý-jattyǵýlardyń jaýyngerlik atys jattyǵýlarymen aıaqtalady, dep habarlaıdy QazAqparat.

QR Qorǵanys mınıstrliginen málim etkendeı, Memleket basshysynyń jaýyngerlik daıarlyq baǵdarlamasyn qaıta qaraý jónindegi tapsyrmasyna sáıkes, Bas shtabta Qarýly kúshterdiń jaýyngerlik oqý protsesin retteıtin qujatty qaıta óńdeýdi júrgizetin jumys toby quryldy.

«Sonymen qatar, áskerlerdi oqytýda jeke quramnyń jaýyngerlik mashyǵyn jetildirýge baǵyttalǵan ózgerister qazirdiń ózinde engizilýde.

Rotany daıyndaý barysynda áskerı qyzmetshilerdiń eldi mekender men taýly jerlerde zańsyz qarýly topqa qarsy epti jáne úılesimdi is-qımyl jasap, shartty qarsylasty barlaý jáne joıý úshin ushqyshsyz ushý apparattaryn qoldanýǵa basa nazar aýdarylady», - dedi mınıstrlikten.

Arnaıy operatsııa júrgizý máselelerin pysyqtaý kezinde basqa áskerler men áskerı quralymdardyń bólimshelerimen ózara is-qımyl jáne is júzinde tájirıbe almasý uıymdastyryldy.

«Rota degenimiz eldi mekende zańsyz qarýly toptarǵa qarsy jaýyngerlik is-qımyl júrgizetin negizgi býyn. Sondyqtan áskerı qyzmetshiler de, komandırler de qubylmaly jaǵdaıda senimdi baǵdarlap, qolda bar kúshter men quraldardy tıimdi paıdalana alýy asa mańyzdy», – dep atap ótti «Ońtústik» óńirlik qolbasshylyǵy áskerleri qolbasshysynyń jaýyngerlik daıarlyq jónindegi orynbasary Baýyrjan Kúreńkeev.