Qazaqstan áskeriniń tájik-aýǵan shekarasynan shyǵarylǵanyna 10 jyl tolýyna arnalǵan respýblıkalyq forým ótýde

1993 jyly TMD memleket basshylary Tájikstan eliniń Aýǵanstanmen shektesetin qorǵaýsyz qalǵan shekarasyna ásker jiberý týraly sheshim qabyldaǵan bolatyn. Elbasynyń usynysymen Qazaqstan Respýblıkasynyń Qorǵanys mınıstrliginiń 500 sarbazy, sonymen qatar UQK Shekara qyzmetiniń jáne ІІM-niń qyzmetkerleri TMD-niń syrtqy shekarasynyń kúzetin kúsheıtýge attandyrylady.

«Jaýyngerler TMD shekarasynyń ońtústik shebin, Aýǵanstanmen shektesetin eń aýyr jáne qıyn ýchaskeniń tynyshtyǵyn kúzetti. Olardyń basty maqsaty - jalpy saıası jaǵdaıdyń turaqtanýyna deıin, tájik-aýǵan shekarasyndaǵy ahýaldy retke keltirý. Sonymen qatar gýmanıtarlyq kómek taýarlarynyń jetkizilimin qamtamasyz etý jáne qorǵaý, bosqyndardyń qaýipsiz jetýin qadaǵalaý, mańyzdy nysandardy qorǵaý boldy»,-deıdi QR Aýǵan jáne jergilikti soǵys ardagerleri odaǵy tóraǵasynyń orynbasary Asqar Shımpeev.

Onyń aıtýynsha, sol mıssııada memlekettik múddeni alǵa qoıyp, shekara tynyshtyǵyn kúzetken TMD áskeri 356 jaýyngerinen aıyryldy. Sonyń ishinde 54-i -qazaqstandyq áskerı qyzmetshiler. Qazaq jaýyngerleri 8 jyldan keıin 2001 jyly 8 aqpan kúni elge oraldy.

«Eń joıqyn qaqtyǵys 1995 jyly Pamır taýlaryndaǵy Pshıhavr shatqalynda oryn aldy. Onda 17 qazaq jigiti sodyrlarmen bolǵan atysta kóz jumǵan bolatyn. Qazirgi kezde olardyń erligi elenip, eldiń árbir óńirlerinde eskertkishter, mektepter men alleıalar boı kóterýde»,-deıdi ol.

QR Prezıdenti N.Nazarbaevtyń Jarlyǵymen qaza tapqan jaýyngerlerdiń beseýi 2-dárejeli «Aıbyn» ordenimen, 12-si «Jaýyngerlik erligi úshin» medaldarymen marapattaldy.

Respýblıkalyq forým bozdaqtarǵa qurmet kórsetip, búgingi jas óskinderge eli úshin maıdanǵa attaný árbir er úshin paryz jáne eren is ekendigin túsindirý maqsatymen ótkizilýde.