Qazaqstan áskeriniń tárbıe qurylymdaryna 30 jyl toldy
Memleket basshysynyń 1993 jylǵy 19 qańtardaǵy Jarlyǵymen Qorǵanys mınıstrliginiń, Respýblıkalyq ulannyń, Shekara jáne Іshki áskerlerdiń basqarý organdary men áskerı bólimderinde komandırlerdiń tárbıe jáne áleýmettik-quqyqtyq jumys jónindegi orynbasarlary laýazymdary engizilgen bolatyn.
30 jyl ishinde tárbıe qurylymdary aıtarlyqtaı damydy. Búgingi tańda tárbıe jáne ıdeologııalyq jumys organdary psıhologııalyq, áleýmettik jáne áskerı-áleýmettik salalardy, áskerı qyzmetshilerdiń otbasylarymen jumysty uıymdastyrýdy qamtıtyn kópfýnktsııaly qurylymǵa aınaldy.
2022 jyly Qazaqstan Respýblıkasy Úkimetiniń qaýlysymen azamattardy áskerı-patrıottyq tárbıeleý qaǵıdalary ázirlenip, bekitildi. Onyń negizinde jastardy Otandy qorǵaý isine tartý jónindegi is-sharalardyń tutas kesheni uıymdastyryldy. Bul baǵytta 250 myńnan astam óskeleń urpaqty biriktiretin «Jas sarbaz» respýblıkalyq balalar-jasóspirimder qozǵalysy jetekshi ról atqarady.
Tárbıe jáne ıdeologııalyq jumys organdary quqyqtyq tártip pen áskerı tártipti saqtaýǵa eleýli úles qosyp keledi. Sońǵy jyldary Qarýly kúshterdegi jaǵymsyz qubylystardyń sany aıtarlyqtaı azaıdy. El Prezıdentiniń tapsyrmalaryn iske asyrý sheńberinde áskerı qyzmetshilerdiń qaza bolýy men jaraqattanýyn barynsha azaıtýǵa baǵyttalǵan «Ómirińdi saqta» baǵdarlamasy qabyldanyp, iske asyrylyp jatyr.
Tárbıe qurylymdarynyń qoǵamdyq uıymdarmen ózara is-qımyly jandandyrylyp, ol qoǵamnyń áskerge degen senimin arttyrýǵa múmkindik berdi. Qarýly kúshter ardagerleriniń jastarmen jumys jasaýdaǵy jáne armııany odan ári damytý baǵyttaryn ázirleýdegi áleýeti de jumys istep tur.
Ofıtser-tárbıeshilerdiń áskerlerdiń oqý-jaýyngerlik qyzmetin, jaýyngerlik kezekshilikti, qaraýyldyq jáne ishki qyzmetti moraldyq-psıhologııalyq qamtamasyz etýdi uıymdastyrýdaǵy qyzmeti asa mańyzdy. Oqý-jattyǵý barysynda jeke quramda qajetti qasıetterdi qalyptastyrý jáne qoldaý, qarsylastyń aqparattyq-psıhologııalyq áserinen qorǵaý máseleleri de pysyqtalady.
Foto: gov.kz
