Qazaqstan áskeriniń 20 paıyzy ózge ult ókilderinen quralǵan – Qorǵanys mınıstrligi
ASTANA. QazAqparat - Búgin Qarýly kúshterdiń áskerı qyzmetshileri búkil elmen birge Qazaqstan halqynyń birligi kúnin atap ótýde, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.
«Armııanyń rýhy men kúshi – birlik pen yntymaqta», delingen mınıstrliktiń baspasó qyzmeti taratqan aqparatta.
Sondaı-aq baspasóz qyzmetiniń málimetterinde statıstıkaǵa sáıkes, armııa quramynyń jıyrma paıyzy ózge ult ókilderi ekeni aıtylǵan.
Qazaqstan halqy Assambleıasynyń XXXII sessııasynda Prezıdent Qasym-Jomart Toqaev bizde jańa jalpyulttyq biregeılik qalyptasqanyn atap ótti. Elde yntymaǵy ortaq murattar men qundylyqtarmen jarasqan júzden astam etnos ókilderi turady.
– Kók tólqujat pen kók tý – bul birkelkiliktiń naqty nyshandary, – dep atap ótti Memleket basshysy óz sózinde.
Túrli sebeptermen ár ýaqytta Qazaqstanǵa júzdegen myń ózge ult ókilderi kelip qonystanǵany tarıhtan belgili. Mundaǵy onsyzda muqtaj jurt eshtemege qaramastan 30-shy jyldardaǵy qýǵyn-súrginge ushyraǵan jáne kúshtep jer aýdarylǵandarǵa qalaı kómek qolyn sozǵany jaıly da kóp aıtylady.
Sondyqtan Qazaqstanda mádenıetter, dástúrler men konfessııalardyń alýan túrliligimen erekshelenetin biregeı áleýmettik-demografııalyq portret qalyptasty.
Qarýly kúshter qatarynda qazaqtar men orystar, ýkraındar men tatarlar, uıǵyrlar men ózbekter, nemister men kárister, belarýstar men qyrǵyzdar, grýzınder men bashqurttar qyzmet etedi.
Qazaqstan áskeri – jaýyngerdiń jeke basyn jaýyngerlik daıarlyq deńgeıi, kásibı sheberligi, jaýyngerlik tapsyrmany jaýapty oryndaýy jáne nátıjesi boıynsha baǵalaıtyn úlken uıymshyl komanda.
Qoǵamda da, áskerde de birlik pen kelisim – bizdiń súıikti Otanymyz – Qazaqstan Respýblıkasynyń aýmaqtyq tutastyǵy men egemendigin qorǵaıtyn Qarýly kúshterdiń jaýyngerlik ázirligi men jaýyngerlik qabiletine baılanysty negizgi basymdyqtar.
