Qazaqstan áskerinde jemqorlyqpen kúres qalaı júrip jatyr - arnaıy komıssııa
Basty taqyryp Memleket basshysynyń tapsyrmalaryn iske asyrý tóńireginde boldy.
– Qarýly Kúshterdiń Joǵarǵy Bas qolbasshysy sybaılas jemqorlyqqa qarsy ymyrasyz kúres jarııalaǵany barshańyzǵa málim. Sybaılas jemqorlyqqa qarsy is-qımyldyń 2022-2026 jyldarǵa arnalǵan memlekettik tujyrymdamasyn iske asyrý barysynda bizdiń komıssııaǵa mańyzdy mindetter júkteldi. Búgin bıylǵy birinshi otyrysty ótkizip otyrmyz. Áskerdegi sybaılas jemqorlyqqa qarsy is-qımyl sharalaryn bıýrokratııany joıýǵa, aıqyndyq pen ashyqtyqty arttyrýǵa baǵyttaımyz, – dep atap ótti Sybaılas jemqorlyqqa qarsy komıssııanyń tóraǵasy Qorǵanys mınıstriniń orynbasary general-leıtenant Sultan Qamaletdınov.
Áskerı ujymdarda sybaılas jemqorlyqpen quqyq buzýshylyqtyń aldyn alý, ony jasaýǵa yqpal etken sebepterdi, sondaı-aq ahýaldy anyqtaý men joıý qorǵanys vedomstvosy qyzmetiniń basym baǵyty bolyp qala bermek.
Jańa qarjy jylynyń ashylýy aldynda ótkizilgen komıssııanyń 2022 jylǵy birinshi otyrysynda memlekettik satyp alý rásimderin ótkizýde qabyldanatyn sharalarǵa, sondaı-aq tirkeý jáne shaqyrý naýqandary barysynda sybaılas jemqorlyqtyń aldyn alý sharalaryna erekshe nazar aýdaryldy. Qyzmettiń osy baǵyttarynda týyndaýy múmkin jemqorlyqtyń táýekelderin qaraý qajet.
Otyrys barysynda Qorǵanys mınıstrliginiń komıssııasy Qarýly Kúshterdegi sybaılas jemqorlyqqa qarsy is-qımyl jónindegi 2021 jylǵy qyzmettiń qorytyndysyn shyǵardy. Sybaılas jemqorlyq qylmystarynyń sany 2020 jylmen salystyrǵanda bir jarym esege tómendegeni atap ótildi.
Vedomstvonyń sybaılas jemqorlyqqa qarsy komıssııasy on otyrys ótkizip, 176 usynym ázirledi. Sybaılas jemqorlyqqa qarsy is-qımyl jónindegi garnızon komıssııalary ózekti máselelerdi talqylaý jóninde 180-nen astam is-shara, quqyq qorǵaý jáne arnaıy organdar qyzmetkerleriniń qatysýymen 300-den astam keńes uıymdastyrdy.
Sybaılas jemqorlyq kórinisteriniń aldyn alýdyń zamanaýı tásilderiniń biri tsıfrlandyrý ekeni aıtyldy. Ol azamattar úshin qyzmetterdiń qoljetimdiligin ǵana emes, birinshi kezekte rásimderdiń ashyq ótýin qamtamasyz etedi. Memleket basshysy tsıfrlandyrý jónindegi jumysta basymdyqtar naqty belgilenýi tıis dep atady.
Osy baǵyttaǵy jumys sheńberinde jergilikti áskerı basqarý organdary men áskerı polıtsııa bólimshelerinde «Qarýly Kúshter – adaldyq alańy» jobalyq keńseleriniń jumysy jandandyryldy. Basqa memlekettik organdardyń aqparattyq júıeleriniń ıntegratsııalaýymen «Tsıfrlyq jergilikti áskerı basqarý organy» pılottyq jobasy ázirlendi. Áskerı polıtsııa «Áskerı senim» mobıldi qosymshasyn iske qosty. Onda 3 000-nan astam adam tirkelip, áleýmettik, qarjylyq jáne quqyqtyq sıpattaǵy máseleler týraly 134 habarlama qabyldandy.
Otyrysta qorǵanys vedomstvosynyń laýazymdy tulǵalary baıandama jasady. Atap aıtqanda, Uıymdastyrý-jumyldyrý jumystary departamentiniń bastyǵy polkovnık Sáken Júsipov jasaǵan baıandamasynda memlekettik qyzmetter kórsetý tártibi týraly halyqpen túsindirý jumysy, azamattardy merzimdi áskerı qyzmetke jáne áskerı jıyndarǵa shaqyrý, sondaı-aq jeke qurammen jeke-tárbıe jumysy jergilikti áskerı basqarý organdaryndaǵy sybaılas jemqorlyqqa qarsy is-qımyl qyzmetiniń basty baǵyttary bolyp tabylatynyn atap ótti.
El Prezıdentiniń tapsyrmalaryn iske asyrý aıasynda general-leıtenant Sultan Qamaletdınov birqatar mindetterdi belgiledi.
– Qorǵanys mınıstrliginiń, Bas shtabtyń jáne Qarýly Kúshterdiń barlyq qurylymdyq bólimsheleriniń basshylary, ásker túrleriniń bas qolbasshylary, tekterdiń, óńirlik qolbasshylyqtar áskerleriniń qolbasshylary sybaılas jemqorlyqqa qarsy is-qımyldy óziniń qyzmettik jumysynyń basty baǵyty dep esepteýi tıis. Olar árbir baǵynysty áskerı qyzmetshige sybaılas jemqorlyqqa qarsy kúrestegi áreketsizdigi úshin jeke jaýapkershilik júkteletinin jetkizýge mindetti, – dep atap ótti komıssııa tóraǵasy.
Memlekettik satyp alýdy uıymdastyrý kezinde bıýrokratııalyq protsesti joıý, olardyń aıqyndyǵy men ashyqtyǵyn keńeıtý mańyzdy baǵyt bolyp belgilendi.
Áskerı qyzmetshilerdi taǵaıyndaý kezinde olardyń moraldyq qasıetterin, polıgrafologııalyq zertteý nátıjelerin, sondaı-aq olardyń sybaılas jemqorlyqqa qarsy sharalar qabyldaýǵa qatynasyn eskerý týraly nusqaýlar berildi. Komandırlerge (bastyqtarǵa) syılyqtar berýdiń, sondaı-aq ruqsatsyz qarajat jınaýdyń jolyn kesý júkteldi.
Tamaqtandyrýdy uıymdastyrý salasynda Sarbazdar analarynyń komıtetin, áskerı qyzmetshilerdiń otbasy múshelerimen jumys jónindegi qyzmetterdi tarta otyryp qoǵamdyq baqylaý sharalaryn qabyldaý qajet.
Qurylymdyq bólimshelerdiń basshylaryna, áskerlerdiń bas qolbasshylaryna jáne qolbasshylaryna senip tapsyrylǵan jáne baǵynysty bólimshelerdegi sybaılas jemqorlyq táýekelderin udaıy anyqtaý jáne taldaý, sybaılas jemqorlyqqa qarsy komıssııaǵa olardy joıý jóninde usynystar engizý tapsyryldy.
