Qazaqstan áskerıleri tájik-aýǵan shekarasynda qaza tapqan jaýyngerler rýhyna taǵzym etti

ASTANA. QazAqparat – Ortalyq Azııa óńiri ujymdyq jedel óristetý kúshteriniń «Rýbej-2022» birlesken oqý-jattyǵýyna qatysýshylar 1995 jyly Tájikstanda qaza tapqan qazaqstandyq áskerı qyzmetshilerdiń eskertkishine gúl shoqtaryn qoıdy. Bul týraly QazAqparat Qorǵanys mınıstrligine silteme jasap habarlaıdy.

Dýshanbe qalasynyń «Dostyq» saıabaǵynda ótken rásimge Tájikstan Respýblıkasyndaǵy áskerı attashe general-maıor Asqar Mustabekov, «Astana» óńirlik qolbasshylyǵy áskerleri qolbasshysynyń birinshi orynbasary polkovnık Baǵlan Óserbaev jáne qazaqstandyq desantshylar qatysty. Olar qaza tapqan áskerı qyzmetshilerdi bir mınýt únsizdikpen eske alyp, bozdaqtardyń rýhyna taǵzym etti.

1995 jyly sáýirde Pshıhavr shatqalyndaǵy tájik-aýǵan shekarasynda Qazaqstannyń bitimgerlik rotasy sodyrlardyń tutqıyldan jasaǵan shabýylyna tap bolǵan. Sol urysta 17 áskerı qyzmetshi qaza tapty.

Aıta ketsek, Tájikstandaǵy «Harbmaıdon» polıgonynda Ortalyq Azııa óńiri jedel óristetý ujymdyq kúshteriniń «Rýbej-2022» birlesken oqý-jattyǵýlary ótip jatyr. Oǵan Qazaqstan Qarýly kúshteri Desanttyq-shabýyldaý áskerleriniń áskerı qyzmetshileri qatysady.

Foto : gov.kz