Qazaqstan áskerıleri Lıvandaǵy bitimgerlik mıssııadan oraldy

ASTANA. QazAqparat – «BUU-nyń Lıvandaǵy ýaqytsha kúshteri» mıssııasyna Úndistannyń bitimgerlik kontıngenti quramynda qatysqan qazaqstandyq áskerıler elge oraldy. QazAqparat bul týraly QR Qorǵanys mınıstrligine silteme jasap habarlaıdy.

«BUU-nyń Lıvandaǵy ýaqytsha kúshteri» mıssııasyna qatysyp jatqan Úndistan Qarýly kúshteriniń bitimgerlik kontıngenti quramyndaǵy qazaqstandyq bitimgerlerdiń kezekti rotatsııasy júrgizildi», - delingen málimette.

Búgin Almaty halyqaralyq áýejaıynda Taıaý Shyǵys elindegi mıssııany aıaqtaǵan áskerı qyzmetshilerdi saltanatty qarsy alý rásimi ótti.

Qazaqstandyq bitimgerler BUU-nyń Lıvandaǵy mıssııasynyń «Shyǵys» sektorynda ornalasty. Olar BUU mandaty aıasynda jaıaý jáne mobıldi patrýldeýdi júzege asyrdy. Jol tosqaýyldarynyń jumysyn uıymdastyrýmen aınalysty. Úndi kontıngentimen birge basqa da mindetterdi oryndady.

«Lıvanda biz úndi batalonynyń quramynda boldyq. Qazaqstannyń halyqaralyq arenadaǵy bedelin nyǵaıtý úshin bárin jasadyq. Shyǵys sektorynyń qolbasshysy men batalon qolbasshylyǵy bizdiń áskerı qyzmetshilerdiń qyzmeti men jaýyngerlik daıarlyq deńgeıin joǵary baǵalady», – dep atap ótti bitimgerlik toptyń komandıri aǵa leıtenant Temirlan Kúmisbekov.

Málim etilgendeı, taıaý ýaqytta elge oralǵan bitimgerler sanatorlyq-kýrorttyq emdelýge jiberiledi. Sodan keıin olar turaqty ornalasqan jeri boıynsha qyzmet atqarýǵa qaıta kirisedi.

Aıta keteıik, búginge deıin Úndistan bitimgerlik kontıngentiniń quramynda 500-den astam qazaqstandyq áskerı qyzmetshi Lıvandaǵy mıssııany oryndaýǵa qatysty.