Qazaqstan áskerıleri kórý qabiletine zaqym kelgen balaǵa kómektesti (FOTO)

ASTANA. QazAqparat - QR Qarýly Kúshteriniń áskerı qyzmetshileri erkin túrde materıaldyq qarajat jınaý arqyly qaıyrymdylyq tanytyp, eki jasar búldirshin Veronıka Grıgorevany emdeýge úles qosty, dep habarlady QR Qorǵanys mınıstrliginiń baspasóz qyzmetinen.

Qarjy jınaý QR QK áskerı qyzmetshileriniń qaıyrymdylyq júgirý sharasynda uıymdastyryldy. Ol «Áskerı áýlet» baıqaýy sheńberinde ótkizilip, 700-den asa adamnyń basyn toǵystyrdy. Áskerı qyzmetshiler bul marafonǵa búkil otbasylarymen qatysty. Osylaısha, óskeleń urpaqqa, óz balalaryna muqtaj adamdarǵa qaıyrymdylyq tanytý, járdem berý men qoldaý kórsetýdiń mańyzdylyǵyn kórsetti. Jınalǵan qarajat Arýjan Saınnyń «DOM» qoǵamdyq qoryna berildi.

Grıgoreva jetilmegen balalardyń retınopatııasyna shaldyqqan. Bul kóz aýrýy kóz qabyrshyǵy damýynyń buzylýy saldarynan paıda bolady jáne tolyq kórý qabiletinen aıyrylyp qalýy da múmkin. Búldirshin kózge jasalatyn tórt otany bastan keshirgen. Bul ota oń nátıjelerin berdi. Endi kelesi jyldyń mamyr aıynda ony qorytyndy operatsııa kútip tur.