Qazaqstan áskerıleri Halyqaralyq armııa oıyndarynyń barlyq kezeńinde jeńiske jetti
Qarýly kúshterdiń Ulttyq áskerı-patrıottyq ortalyǵynda Halyqaralyq armııa oıyndarynyń saltanatty jabylý rásimi ótti.
«Artıllerııalyq atys sheberleri», «Taktıkalyq mergen», «Merıdıan» konkýrstary Jambyl, Qaraǵandy jáne Aqmola oblystaryndaǵy úsh oqý-jattyǵy polıgonynda ótti. Oǵan Qazaqstan, Ázerbaıjan, Armenııa, Belarýs, Venesýela, Vetnam, Zımbabve, Iran, Qytaı, Qyrǵyzstan, Malı, Reseı, Tájikstan jáne Ózbekstan komandalary qatysty.
Úsh konkýrstyń bárinde Qazaqstannyń áskerı qyzmetshileri jeńiske jetti.
Qorǵanys mınıstriniń birinshi orynbasary – QR Qarýly kúshteri Bas shtabynyń bastyǵy Marat Qusaıynov áskerıler básekesiniń qorytyndysyn jarııa etti.
Máselen, Jambyl oblysyndaǵy «Gvardeısk» polıgonynda ótken «Artıllerııalyq atys sheberleri» konkýrsynda qazaqstandyq mınomet eseptoptary birinshi orynǵa ıe boldy. Barlyq kezeńderdiń qorytyndysy boıynsha ekinshi oryndy Reseıdiń áskerı qyzmetshileri ıelense, úshinshi orynǵa Ázerbaıjannyń artıllerısteri kóterildi.
Qaraǵandy oblysyndaǵy «Spassk» polıgonynda ótken «Taktıkalyq mergen» baıqaýynda birinshi kezeńnen-aq Qazaqstan komandasy kósh bastady. Bizdiń jaýyngerler barlyq kezeńderde senimdi jeńiske jetip, baıqaý qorytyndysy boıynsha birinshi orynǵa ıe boldy. Jeńis tuǵyrynyń ekinshi satysyna Qytaı komandasy kóterilse, úshinshi oryndy Ózbekstan men Reseı quramalary bólisti.
Aqmola oblysyndaǵy «Amandyq» polıgonynda Áskerı topograftar kásibı sheberlikterin synǵa saldy. «Merıdıan» baıqaýynda da birinshi orynǵa Qazaqstan komandasy ıe boldy. Ekinshi oryndy – Qytaı áskerı qyzmetshileri, úshinshi oryndy Ózbekstan men Belarýs komandalary ózara bólisti.
Jarys jeńimpazdary men júldegerleri medaldarmen jáne dıplomdarmen marapattaldy. Sonymen qatar ár konkýrsta jeke nomınatsııalar boıynsha jeńimpaz atanǵandar da júldelermen marapattaldy.
Foto: QR Qorǵanys mınıstrliginiń baspasóz qyzmeti
