Qazaqstan áskerıleri «Dalalyq as úı» jáne «Qaýipsiz orta» baıqaýlarynda qola medaldarǵa ıe boldy

ASTANA. QazAqparat - Reseı Federatsııasynda «Dalalyq as úı» halyqaralyq baıqaýynyń qorytyndysy shyǵarylyp, onyń júldegerleri men jeńimpazdaryna nagradalar men baǵaly syılyqtar tabys etildi, dep habarlaıdy QR Qorǵanys mınıstrliginiń baspasóz qyzmeti.

Qazaqstan áskerı qyzmetshileriniń komandasy Armııa oıyndarynyń atalmysh  saıystarynda qola júldeger atandy. Angola, Qazaqstan, Qytaı, Mońǵolııa jáne Reseı Qarýly kúshteriniń azyq-túlik mamandary sheberlik synybyn kórsetti. Jarysta sheberlik synalyp men dalalyq jaǵdaılarda dámdi jáne densaýlyqqa paıdaly taǵamdy daıyndaýdyń zamanaýı tehnologııalaryn usyndy.

RF Qorǵanys mınıstriniń orynbasary armııa generaly Dmıtrıı Býlgakov  osyndaı baıqaýlardyń ótkizilýi ártúrli elderdiń armııalary arasynda ózara is-qımyldy nyǵaıtýǵa, sondaı-aq, ózge de áskerı kásipterdiń arasynda materıaldyq-tehnıkalyq qamtamasyz etý mamandarynyń bedelin arttyrýǵa yqpal etedi dep senimin bildirdi.

«Qaýipsiz orta» halyqaralyq baıqaýynda Qazaqstannyń komandasy úshinshi oryndy enshiledi.  Saıys júrgizý, atys daıarlyǵy, sondaı-aq, radıatsııalyq, hımııalyq jáne bıologııalyq qorǵaý boıynsha 24 normatıvtiń oryndalýyn qamtydy. Jarysta árbir ekıpajǵa orlarmen, eskarptarmen, transheıalarmen, gabarıttik tonneldermen, tóbeshiktermen, betkeılermen, aınalyp ótetin jerlermen, sýly kedergi jáne atystyq-shabýyldaý jolaǵymen jabdyqtalǵan baǵdardy eńserýge týra keldi.