Qazaqstan áskerıleri AQSh-taǵy áriptesteriniń tájirıbesimen tanysty
QR QK Bas shtaby bastyǵynyń orynbasary - QR QK BSh Tárbıe jáne ıdeologııalyq jumystar departamentiniń bastyǵy general-maıor Muhamedjan Talasov basshylyq etken delegatsııa Áskerı qyzmetshiler men olardyń otbasy múshelerine qoldaý kórsetý ortalyqtarynyń qyzmetimen tanysty, áskerı qyzmetshiler arasyndaǵy ózine-ózi qol jumsaý kórinisterin aldyn alýdyń uıymdastyrylýy men AQSh QK-degi kapellandar korpýsynyń tynys-tirshiligin zerdeledi.
QR QK tárbıe qurylymdarynyń ókilderi AQSh Áskerı qyzmetshiler men olardyń otbasy múshelerine qoldaý kórsetý ortalyqtarynyń qyzmetine qyzyǵýshylyq tanytty.
«AQSh-ta mundaı ortalyqtar árbir áskerı garnızonda qurylǵan. Ortalyqtar áskerı qyzmetshiler men olardyń otbasy múshelerine qoldaý kórsetý jóninde áleýmettik baǵdarlamalardy ázirlep, iske asyrady, garnızon aýmaǵynda bos ýaqytty ótkizýdi, áskerı qyzmetshilerdiń jubaılaryn jumysqa ornalastyrýdy uıymdastyrady, tómendetilgen baǵamen ártúrli turmystyq qyzmetter usynady, otbasylyq-turmystyq qarym-qatynastardy zerdeleıdi, moraldyq-psıhologııalyq, konsýltatıvtik jáne qarjylaı kómek kórsetedi», delingen habarlamada.
QR QK-niń delegatsııasy AQSh-tyń armııasyndaǵy Ózine-ózi qol jumsaý kórinisteriniń aldyn alý jónindegi qyzmetindegi «jaýyngerlik jup» júıesin atap ótti. Qatardaǵy jaýynger jáne kishi serjanttar quramynyń barlyq sanattaǵy áskerı qyzmetshileri jupqa bólingen jáne árqaısysy óziniń seriktesiniń moraldyq-psıhologııalyq jaı-kúıin baqylap otyrady. «Jaýyngerlik qarýlastar» atty mundaı uqsas júıe Qazaqstannyń Qurlyq áskerlerinde is júzinde qoldanylyp júr.
AQSh armııasynda ózine-ózi qol jumsaý problemalaryn sheshý jáne áskerı qyzmetshilerge ıdeologııalyq tárbıe berýge áskerı kapellandar korpýsy da úles qosady. Bul teologııalyq, ıaǵnı, dinı bilimi bar ofıtserler. Olar dinı ilim jáne patrıottyq tárbıe berý, otbasylyq qundylyqtardy baǵalaý, sýıtsıdti aldyn alýmen aınalysady.
