Qazaqstan áskeri ulan-ǵaıyr dalamyzdy qapysyz qorǵaýǵa qabiletti - N. Nazarbaev
ASTANA. QazAqparat - Búgin 7 mamyr memlekettik mereke - Otan qorǵaýshy kúni men Uly Otan soǵysyndaǵy Jeńistiń 70 jyldyǵyna arnalǵan Astanadaǵy «Qazaq Eli» alańynda ótip jatqan áskerı paradta QR Prezıdenti, QR Qarýly Kúshteriniń Joǵarǵy Bas Qolbasshysy Nursultan Nazarbaev barsha qazaqstandyqtardy merekemen quttyqtady.
Paradty qabyldaý barysynda sóz sóılegen Elbasy eń aldymen barsha jurtshylyqty Qazaqstan Respýblıkasynyń Otan qorǵaýshylar kúnimen quttyqtady. «Qymbatty otandastar! Qurmetti sardarlar men sarbazdar! Otan qorǵaýshylar kúni jáne Uly Otan soǵysynyń 70 jyldyǵy barshamyzǵa qutty bolsyn!», dedi N. Nazarbaev. Sonymen qatar, Memleket basshysy osydan 23 jyl buryn dál osy kúni Qazaqstannyń Qarýly Kúshteri qurylǵanyn, búginde ol kásibı sarbazdar men zamanaýı jaraqtardan turatyn aıbyndy armııaǵa aınalǵanyn jetkizdi.
«Bizdiń áskerimiz ulan-ǵaıyr dalamyzdyń árbir qadam jerin qapysyz qorǵaýǵa qabiletti. Biz babalarymyzdyń erlik jolyn qasterlep, eldik jolyn jaqtaǵan urpaqpyz. Qanymyzǵa sińgen qasterli boryshty antyna adal erlerimiz qazir de abyroımen atqarýda. Er azamat úshin týǵan jerdiń tutastyǵyn, týǵan eldiń tynyshtyǵyn kúzetýden asqan abyroı bolmasa kerek! Sizderdiń qyzmetterińiz el Táýelsizdiginiń jáne halqymyzdyń bolashaq seniminiń kepili», - dedi QR Qarýly Kúshteriniń Joǵarǵy Bas Qolbasshysy.
