Qazaqstan áskeri Túrkııadaǵy áskerı jattyǵýlarǵa qatysyp jatyr

KARS. QazAqparat - Túrkııanyń shyǵysyndaǵy Kars provıntsııasynda «Qys-2023» eń iri áskerı jattyǵýlary ótip jatyr. Bıyl áskerı manevrlerge qazaqstandyq áskerler de qatysyp jatyr, dep habarlaıdy QazAqparat tilshisi.

Sharaǵa álemniń 17 eliniń áskeri qatysýda.

Jattyǵýlar 10 qańtarda bastalyp, Túrik Qarýly Kúshteriniń 14-shi motoatqyshtar brıgadasy qolbasshylyǵynyń jaýapty aımaǵyndaǵy atys polıgonynda ótip jatyr. Jattyǵýlardy úılestirý Túrkııa Respýblıkasy Qarýly Kúshteri Qurlyq áskerleriniń 9-shy korpýsynyń qolbasshylyǵyna júktelgen.

Jalpy, qysqy oqý-jattyǵýlarǵa 1758 áskerı qyzmetker qatysyp, 651 tehnıka jumyldyrylǵan, 865 qarý-jaraq qoldanylýda. Oqý-jattyǵýlarǵa sondaı-aq avıatsııa, tank brıgadalary, artıllerııalyq bólimsheler, mınometshiler men mergender, sondaı-aq arnaıy jasaq bólimsheleri tartyldy.

Komandalardy daıyndaýdyń negizgi mindeti - qysqy jaǵdaıda tehnıkalyq qyzmet kórsetý jáne baqylaý júıesiniń jumysyn qamtamasyz etý. Jalpy mindetter aıasynda birlesken is-qımyldar kezinde ózara is-qımyl men úılestirýdi qamtamasyz etý, jaýyngerlik tehnıkanyń jumysyn baqylaý, sondaı-aq bólimshelerdiń arnaıy múmkindikterin qamtamasyz etý boıynsha áskerlerdiń daıyndyq deńgeıi tekseriledi.

Qazaqstandyq áskerı qyzmetshiler mundaı oqý-jattyǵýlarǵa 2022 jyly Qazaqstannyń arnaıy operatsııalyq kúshteri qurylǵannan beri alǵash ret qatysýda. Olar halyqaralyq deńgeıde jaýyngerlik daıyndyqta aıtarlyqtaı jaqsy nátıjeler kórsetýde.

Jattyǵýlar 2 aqpanda aıaqtalady.

Aqjigit Shúkibaev