Qazaqstan Áskerı-teńiz kúshteriniń kemeleri qysqa daıyn

ASTANA. KAZINFORM - Kaspıı teńizinde Qazaqstan Respýblıkasy Áskerı-teńiz kúshteriniń kemelerin aldaǵy qysqy kezeńge josparly daıyndaý aıaqtalýǵa jaqyn. Kún sýytqanda júzý qysqy otyndy paıdalanýmen qosa, qysqy jumys rejımine kóshýdi talap etedi. Janar-jaǵarmaı materıaldarynyń qory da ázirlengen.

QR Qorǵanys mınıstrligi baspasóz qyzmetiniń habarlaýynsha, daıyndyq sheńberinde kemelerdiń qysqy jaǵdaıda senimdi jumysyn qamtamasyz etý jónindegi is-sharalar kesheni ótkizildi. Kemelerdiń syrty, ıllıýmınatorlar men lıýkterdiń germetıkalyǵy tekserildi, palýbalyq mehanızmder tazalanyp, maılandy. Artıllerııalyq júıeler men shaǵyn kalıbrli qarý-jaraq qondyrǵylaryn tazartý jáne konservatsııalaý júrgizildi.

Áskerı-teńiz kúshteriniń barlyq túrleri – zymyrandy-artıllerııalyq kemeler, patrýldik jáne desanttyq qaıyqtar, sondaı-aq gıdrografııalyq kemeler qysqa daıyndalyp jatyr. Sonymen qatar, arqanmen baılaý, zákir jáne palýba qurylǵylaryn tekserý, odan basqa muzdy urýǵa arnalǵan qurylǵylardy daıyndaý jumystary júrgizilip jatyr.

Jeke quramdy daıyndaýǵa erekshe kóńil bólingen. Kemeler ekıpajdary qysqy kıim-keshekpen qamtamasyz etilip, jyly kıimder men kostıýmderdiń jańa úlgileri synaldy.

Qysqy kezeńde teńizge shyǵý sanynyń qysqarýyna qaramastan, Qazaqstannyń Áskerı-teńiz kúshteri Kaspıı teńiziniń qazaqstandyq sektorynda qaýipsizdikti qamtamasyz etý jáne qolaıly jedel jaǵdaıdy qoldaý jónindegi óziniń negizgi mindetterin tolyq kólemde oryndaýdy jalǵastyrady.

«Qysqy daıyndyq – jáı tehnıkalyq qyzmet kórsetý ǵana emes, teńiz tehnıkasynyń jaýyngerlik daıyndyǵynyń mańyzdy bóligi. Biz korablderdiń senimdiligin, ekıpajdardyń qaýipsizdigin jáne kez kelgen aýa raıy jaǵdaıynda tapsyrmalardy oryndaý qabiletin qamtamasyz etemiz», – dep atap ótti 3 dárejeli kapıtan Ermek Ospanov.

Qazaqstan Respýblıkasy Áskerı-teńiz kúshteriniń ártúrli qarý-jaraq pen áskerı tehnıka sanynyń 100-den astamy qysqy kezeńde paıdalanýǵa aýystyryldy.

Osyǵan deıin áskerı oqý oryndarynda zamanaýı soǵys talaptaryna saı mamandar daıarlanyp jatqany týraly jazdyq.