Qazaqstan áskerı qýaty boıynsha álemdik reıtıngide 145 eldiń ishinde 63-orynda tur
Finprom.kz portalynyń jazýynsha, Global Firepower-diń áskerı qýaty boıynsha reıtınginde Qazaqstan 145 eldiń ishinde 63-orynda tur. Eldiń ındeksi - 1,0873. Kórsetkish neǵurlym joǵary bolsa, memlekettiń áskerı qýaty soǵurlym joǵary degendi bildiredi.
Reıtıng sarapshylary 60 túrli faktordy baǵalaıdy. Onyń ishinde qorǵanys shyǵyndarynyń deńgeıi, tehnıka men qurylǵynyń arsenaly, áskerdiń kólemi, tankterdiń, kemelerdiń, ushaqtardyń jáne basqa da áskerı tehnıkalardyń sany, munaı, kómir jáne basqa resýrstarǵa qoljetimdilik qaperge alynady. Bul rette ıadrolyq qarýdyń bolýy eskerilmedi.
Reıtıngke sáıkes, áskerı qýaty eń joǵary elder — AQSh, Reseı jáne Qytaı. Al Býtan reıtıngtiń eń sońynda tur.
TMD elderiniń ishinde Reseıden basqa Qazaqstannyń kórsetkishi Ýkraına, Ázirbaıjan, Belarýs jáne Ózbekstannan tómen. Reıtıngte Qazaqstannan tómen Túrikmenstan, Armenııa, Qyrǵyzstan, Tájikstan jáne Moldova ornalasqan.
Qazaqstannan joǵary turǵan TMD elderiniń ishinde Reseı qorǵanys salasyna 82,6 mlrd AQSh dollaryn, Ýkraına 30 mlrd AQSh dollaryn, Ázirbaıjan 3,1 mlrd AQSh dollaryn jumsaıdy. Bul rette Belarýs pen Ózbekstannyń bıýdjeti Qazaqstandaǵydan birneshe ese tómen bolyp shyqty: Qazaqstanda 2,6 mlrd AQSh dollary bolsa, atalǵan eki elde tıisinshe 723,1 mln jáne 692,5 mln AQSh dollary.
Global Firepower sarapshylarynyń málimetinshe, QR avıatsııasynda 237 ushatyn qural, onyń ishinde 75 jaýyngerlik tikushaq bar. Al ushaqtardyń ishinde 39 shabýyldaýshy ushaq, 81 joıǵysh, 17 kólik jáne 25 oqý-jattyǵý ushaǵy tirkelgen. Eldiń qurlyqtaǵy kúshterinde 300 tank, 5,2 myń brondy tasymaldaýshy, 246 ózdiginen júretin artıllerııalyq qondyrǵy, 456 súıretiletin artıllerııalyq qondyrǵy jáne 407 kóp rettik zymyran júıesi bar.
Áskerı qyzmetkerlerdiń jalpy sany 77 myń adamdy quraıdy, onyń 45 myńy belsendi áskerıler, 32 myńy áskerılendirilgen quramalarǵa jatady.
