Qazaqstan áskerı qyzmetshileri dzıýdodan halyqaralyq standart boıynsha daıyndalady
ASTANA. KAZINFORM – Qazaqstan Qorǵanys mınıstri, avıatsııa general-leıtenanty Dáýren Qosanov Astanada Halyqaralyq dzıýdo federatsııasynyń prezıdenti Marıýs Vızermen kezdesti.
Qorǵanys mınıstrliginiń málimetinshe, kelissóz qorytyndysynda Qazaqstan Qarýly kúshteri júıesinde dzıýdony damytýǵa baǵyttalǵan yntymaqtastyq týraly memorandýmǵa qol qoıyldy.
– Qujat Qorǵanys mınıstrliginiń joǵary áskerı oqý oryndary men kolledjderiniń bilim berý baǵdarlamalaryna halyqaralyq dzıýdo júıesin kezeń-kezeńimen engizýdi kózdeıdi. Sonymen qatar dzıýdo elementteri Qarýly kúshter áskerı qyzmetshileriniń dene daıarlyǵy sabaqtaryna da engiziledi, – delingen vedomstvo habarlamasynda.
Joba aıasynda materıaldyq-tehnıkalyq bazany nyǵaıtýǵa da erekshe kóńil bólinedi.
Halyqaralyq dzıýdo federatsııasynyń jáne «Jeńis» klýbynyń qoldaýymen áskerı bilim berý uıymdaryn tatamı, sporttyq qural-jabdyqtar jáne kımonomen qamtamasyz etý josparlanǵan.
Sonymen qatar kýrsanttar men kadetter arasynda dzıýdo lıgalaryn qurý kózdelip otyr. Taraptardyń pikirinshe, mundaı bastama sportshylardyń tehnıkalyq sheberligin arttyryp, básekelestikti damytýǵa jáne dzıýdony keńinen nasıhattaýǵa múmkindik beredi.
Aıta keteıik, Qazaqstan dzıýdo quramasy Qazaqstan Barysy Grand Slam jarysyn tarıhı nátıjemen aıaqtady.
