Qazaqstan áskeri qatarynda 8000-ǵa jýyq áıel qyzmet atqarýda

ASTANA. QazAqparat - Óziniń kásibin Otan qorǵaýshy retinde tańdaǵan adamdardyń boıynan batyldyq pen tabandylyq qasıetteri tabylady. Bul qasıetter Qarýly Kúshterde qyzmet etip júrgen er adamdardyń ǵana emes, sonymen birge názik jandy arýlardyń boıynda da bar, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Vedomstvo málimetinshe, bólimshelerdiń jaýyngerlik ázirligin aıqyndaıtyn laýazymdaǵy qyzmetshilerdiń 30 paıyzdan astamyn áıelder quraıdy. Olar dıspetcherlik qyzmet, medıtsına, baılanysty uıymdastyrý jáne bólimshelerde isteıdi. Máselen, «Ońtústik» óńirlik qolbasshylyǵynda Armııa halyqaralyq oıyndary aıasynda 2017 jyldyń tamyz aıynda Sankt-Peterborda ótken «Áskerı-medıtsınalyq estafeta» baıqaýynda jeke esepte úshinshi oryndy enshilegen 66597 áskerı bólimi barlaý-shabýyldaý rotasynyń mergeni efreıtor Shamshyraq Serjanova qyzmet etedi. Názik, sulý jáne taldyrmash arýdyń boıynda qýatty ishki energııa jáne fızıkalyq kúsh bar.

«Shyǵys» óńirlik qolbasshylyǵyna qarasty 36803 áskerı bólimi zymyran dıvızıonynyń esepteýish mamany efreıtor Tatıana Kýptsova óz isiniń has sheberleriniń biri. Qyzmettik mansabyn telefonıst laýazymynan bastaǵan jáne qazirgi kúnge deıin óziniń qyzmetin «Shyǵys» ÓńQ 36803 áskerı bóliminde jalǵastyrýda. Sonymen qatar Tatıana shańǵy jarysy boıynsha saıystarda birneshe dúrkin júldeger atanyp, birneshe márte óńirlik qolbasshylyqtyń namysyn qorǵady.

Qazaqstannyń ımıdjin nyǵaıtýǵa ártúrli sporttyq saıystarǵa, Olımpıada oıyndaryna, álem chempıonattaryna, Azııa oıyndary men ózge de saıystarǵa qatysyp júrgen armııalyq sportshylar da úlesterin qosyp júr. QR QM Armııa ortalyq sport klýbynyń sportshylary elimizdiń quramasynyń qorjynyń birneshe ret medaldarmen tolyqtyrdy. Áıel áskerı qyzmetshiler «Dostastyq jaýyngeri» halyqaralyq baıqaýlarynda, Armııa halyqaralyq oıyndary saıystarynda elimizdiń namysyn qorǵaıdy. Olar búginde otbasylyq ómir men kásibı mansapty qatar alyp júre alatyndaryn dáleldedi.