Qazaqstan áskeri bıyl qandaı birlesken áskerı jıyndarǵa qatysady

ASTANA. QazAqparat – Qazaqstan áskerıleri bıyl eki halyqaralyq áskerı jıynǵa qatysady. Bul týraly QR Qarýly Kúshteri Bas shtaby Jedel josparlaý departamenti bastyǵynyń orynbasary Dáýren Abdýllın ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Bıyl Belorýs aýmaǵynda oqý-jattyǵý jıyndary josparlanǵan. Dál osy oqý-jattyǵý jıyndary byltyr UQShU-nyń birlesken áreketter jospary aıasynda Qazaqstan aýmaǵynda ótken bolatyn. Bıylǵy jıynǵa bizdiń Qarýly Kúshterden jeke quramnyń 80-ge jýyq kontıngenti tartylady. Odan bólek, kórshiles Qyrǵyz Respýblıkasy aýmaǵynda «Myzǵymas baýyrlastyq» oqý-jattyǵý jıyndaryna da jeke quramnyń 130 adamy, 30-ǵa deıin áskerı tehnıka tartylady», - dedi ol.

Qarýly Kúshter polkovnıgi «Batyl toıtarys» jıyny bıyl qyrkúıek aıynda ótetinin aıtty.

«Qalǵan jıyndar Qazaqstannyń óz aýymaǵynda, ózimizdiń jattyǵý polıgondarymyzda ótedi. Olardyń ishindegi eń irileriniń biri – «Batyl toıtarys» keshendi vedomstvoaralyq strategııalyq komandalyq-shtabtyq oqý-jattyǵýy. Ol bıyl qyrkúıek aıyna josparlanǵan. Onyń aıasynda «Shyǵys-2023» jedel-taktıkalyq oqý-jatytǵý jıyndary ótedi», - dedi Dáýren Abdýllın.

Al Bas shtab bastyǵy - QR Qarýly kúshteri Qurlyq áskerleri bas qolbasshysynyń birinshi orynbasary Qanysh Ábýbákirovtiń sózinshe, Qazaqstan áskerıleri bıyl da birneshe bitimgerlik jıynǵa qatysady.

«Bizdiń Qarýly Kúshter oqý-jattyǵý jıyndarynan bólek birlesken bitimgerlik jıyndarǵa qatysady. Olardyń ishinde Amerıka Qurama Shtattary, Ulybrıtanııa, Italııa, Túrkııa, Úndistan jáne Ózbekstan sııaqty elder bar. 10 jyldan asty, bitimgerlik jıyndar aıasynda «Dala búrkiti» oqý jattyǵý-jıyndary ótip kele jatyr. Sondaı-aq, biz «Kembrıdj patrýli» deıtin barlaýshylar oqý-jattyǵý jıyndaryna qatysamyz. Bulardyń bári áskerılerdiń bilim-biligin arttyryp, ózge elderdiń ozyq tájirıbesin almasýǵa baǵyttalǵan», - dedi Bas shtab bastyǵy.