Qazaqstan Áskerı-áýe kúshteriniń ushqyshtary alǵash ret teńiz ústinde ushýlardy pysyqtady (FOTO)

ASTANA. QazAqparat - Qazaqstan QK Áskerı-áýe kúshteriniń ushqyshtary alǵash ret Sý-27 joıǵyshtarynda jaýyngerlik daıarlyq josparyna sáıkes Kaspıı teńiziniń beıtarap sýlarynda oqý-jattyqtyrý ushýlaryna kiristi. Óziniń geografııalyq ornalasýyna baılanysty bul abyroıly mindet Aqtaý avıatsııalyq bazasyna buıyrdy, dep habarlady QR Qorǵanys mınıstrliginiń baspasóz qyzmetinen.

Teńiz ústinde ushý kúrdeli bolyp sanalady. Kádimgi daıyndyqtan basqa ushý aýdanyn zerdeleý, aýa raıy jaǵdaıyn, shtýrmandyq ushý eseptobyn taldaýdy ushqyshtar qosymsha izdestirý-qutqarý korablderi men áýe kemeleriniń ornalasýyn, olarmen ózara áreket jasaý tártibin, jaǵalyq jaryq jáne radıomaıaktardyń jumys jasaý rejimderin zerdeleýi tıis.

Odan basqa, áskerı qyzmetshiler áýe navıgatsııasynyń radıotehnıkalyq quraldarynyń bútindigin, jeke qutqarý quraldarynyń bolýyn tekserýi tıis edi.

Ushýlar baǵdarsyz jerde ótýine ári kókjıektiń teńizben sarqylýyna baılanysty ushqyshqa túsetin psıhologııalyq júkteme anaǵurlym kúsheıedi. Bul qosymsha moraldyq-psıhologııalyq daıyndyqty qajet etedi.

«Teńiz ústinde ushýǵa kirise otyryp, biz ekıpajdarymyzdyń ushý turǵysyndaǵy jattyqtyrylý deńgeıin arttyramyz. Nátıjesinde bul jalpy alǵanda, áskerı-áýe kúshteriniń jaýyngerlik ázirlik deńgeıin arttyrady, al bul degenimiz birinshi kezektegi mindet», - dep QR QK ÁQK ÁÁK-niń qolbasshysy avıatsııa general-maıory Dáýren Qosanov atap ótti.

Ashyq teńiz (beıtarap sýlar) - bul qandaı da bir memlekettiń aýmaqtyq, arhıpelagty jáne ishki sýlarynan tysqary ornalasqan jáne halyqaralyq quqyq qaǵıdattary men normalaryna sáıkes erkin jáne teń quqyqtyq paıdalanýda turǵan teńiz keńistigi ekenin aıta keteıik.