Qazaqstan Áskerı-áýe kúshteri jańa S-295 áskerı ushaǵymen tolyqty

ASTANA. QazAqparat - Ótken demalys kúnderi Almaty qalasyndaǵy avıatsııalyq bazaǵa Qazaqstan áskerı-áýe kúshteri úshin tórtinshi S-295 ushaǵy kelip qondy. Bul ushaq Qazaqstan tarapy men eýropalyq «Airbus Military» avıatsııalyq kontserniniń arsynda buǵan deıin jasalǵan kelisimshartqa sáıkes kelip otyr. Bizdiń Qarýly Kúshter úshin osyndaı segiz áýe kemesi jetkiziletin bolady, dep habarlady QR Qorǵanys mınıstrliginiń baspasóz qyzmetinen.

Ushaqtyń ushyp kelýi Ispanııa - Grekııa - Ázerbaıjan - Qazaqstan baǵytymen úsh kezeńde júzege asty. Ony áýe kemesiniń komandıri maıor Dmıtrıı Grots, komandırdiń kómekshisi maıor Arman Janıkeev bastaǵan qazaqstandyq ekıpaj ben ıspanııalyq ekıpaj júzege asyrdy.

Bul tektes ushaqtar Qazaqstanda 2012 jylǵy jeltoqsannan beri paıdalanylyp keledi. Búginde qazaqstandyq ushqyshtar men tehnıkter olardy tolyqtaı ıgerdi. S-295 ekıpajdary Qazaqstan aýmaǵynda jáne alys shetelderde ótken barlyq oqý-jattyǵýlarǵa qatysyp júr. Paıdalanýǵa berilgen eki jyl ishinde S-295 bizdiń tabıǵı-klımattyq jaǵdaıda ózin senimdi jáne kúı talǵamaıtyn ushaq retinde kórsetti. Qazirgi tańda Qarýly Kúshterdiń tehnıkalyq jaraqtanýy aıtarlyqtaı artty. Qarýly Kúshterdi qazirgi zamanǵy avıatsııalyq tehnıkalarmen jaraqtandyrý áskerlerdiń utqyrlyǵyn arttyryp, áskerı-kóliktik avıatsııa parkin jańartýǵa múmkindik beredi.