Qazaqstan áskeri «Álem jaýyngeriniń» áskerı-qoldanbaly saıysynda úzdik atandy

NUR-SULTAN. QazAqparat – Qazaqstandyq artıllerısterdiń, áskerı topograftar men atqyshtardyń halyqaralyq armııa oıyndary baıqaýlaryndaǵy senimdi jeńisterinen keıin Qazaqstannyń taǵy tórt komandasy Armenııa, Ázerbaıjan jáne Reseıdegi jarys alańdarynda óner kórsetýin jalǵastyrdy, dep habarlaıdy QazAqparat QR Qorǵanym mınıstrliginiń baspasóz qyzmetine silteme jasap.

Dılıjanda (Armenııa) ótip jatqan «Álem jaýyngeri» baıqaýynyń «Ratnık» kezeńinde qazaqstandyq komanda erler arasyndaǵy áskerı-qoldanbaly keshende jeńiske jetti. Ekinshi orynda – Belarýs, úshinshi orynda – Reseı komandalary. Dúısenbide atys jattyǵýlarynan, áskerı-medıtsınalyq jáne áskerı-qoldanbaly keshenderden turatyn kezeńniń sońǵy nátıjeleri shyǵarylady.

Kabardıno-Balkarııada «Terskol» taý daıyndyǵy oqý ortalyǵynda «Elbrýs saqınasy» konkýrsynda kóshbasshylyq úshin tabandy kúres jalǵasyp jatyr. Bir kún buryn áskerı alpınıster toǵyzynshy arnaıy tapsyrmany oryndady. Jartas ýchaskesinen ótý jarysynda Qazaqstan komandasy úshinshi nátıje kórsetti. Birinshi orynda – Reseı komandasy, ekinshi orynda – Ózbekstan.

Búgin baıqaýǵa qatysýshylar Irık shatqalynan (2 800 m) Kishi Azaý muzdyǵyna (3 264 m) 25 shaqyrymdyq jaıaý marsh jasaıdy. Dúısenbi kúni baıqaýǵa qatysýshylar muz ýchaskesinde kóterilý/túsý jáne zardap shegýshini tasymaldaýǵa arnalǵan arnaıy tapsyrmalardy oryndaıdy.

Máskeý túbindegi «Alabıno» polıgonynda Qazaqstan komandasynyń tankısteri «Tank bıatlony» jartylaı fınaldyq estafetasynyń ótetin kúni men qarsylastaryn anyqtaıtyn jerebe tartýdy kútip otyr. Ázerbaıjandaǵy «Teńiz kýbogi» baıqaýynda 22 tamyzda qatysýshylar jaýyngerlik júzýshiler sheberliginde baq synaıdy.

Foto : gov.kz