Qazaqstan áskeri urys qımyldarynyń jańa formatyna beıimdelip jatyr
ASTANA. KAZINFORM — Almaty óńirlik garnızonynda Qorǵanys mınıstriniń birinshi orynbasary — Qarýly kúshter Bas shtabynyń bastyǵy general-leıtenant Qanysh Ábýbákirovtiń jetekshiligimen oqý-ádistemelik jıyndar ótýde.
Іs-shara barysynda zamanaýı qarýly qaqtyǵystar jaǵdaıyna beıimdelgen jaýyngerlik daıarlyq júıesin jetildirý máselelerine basymdyq berilý ústinde. Jıynǵa Qarýly kúshterdiń ártúrli túrleriniń, Arnaıy operatsııalar kúshteri men Desanttyq-shabýyldaý áskerleriniń ókilderi qatysyp jatyr. Jumys oryndalatyn mindetterdiń erekshelikterine qaraı bes baǵyt boıynsha uıymdastyrylǵan. «Bitimger» oqý ortalyǵynda áskerlerdi daıarlaýdyń jańartylǵan tásilderi tanystyrylyp, brıgadanyń kúndelikti qyzmetin josparlaý tártibi boıynsha kórsetilim sabaqtary ótkizildi.
Serjanttyq quramdy damytýǵa erekshe nazar aýdaryldy. Áskerı qyzmetshiler úshin bólimshelerdi basqarýdaǵy tsıfrlyq sheshimderdi qoldaný boıynsha praktıkalyq sabaqtar jáne qazirgi zamanǵy urys jaǵdaıyndaǵy baılanys pen basqarýdy uıymdastyrý máselelerine arnalǵan dárister uıymdastyryldy.
Jıyn aıasynda Qorǵanys mınıstrligi, Bas shtab jáne Qarýly kúshter basshylyq quramynyń qatysýymen dóńgelek ústel ótti. Qatysýshylar áýe shabýylyna qarsy qorǵanys, taktıkalyq bólimsheler men zymyran áskerlerin qoldaný, radıoelektrondyq kúres jáne ushqyshsyz ushý apparattaryn paıdalaný máselelerin talqylady.
Sonymen qatar qazirgi qaýip-qaterlerdi eskere otyryp, áskerlerdi ınjenerlik, tehnıkalyq jáne tyldyq qamtamasyz etý máseleleri qarastyryldy.
Jıyn qorytyndysy boıynsha general-leıtenant Qanysh Ábýbákirov qazirgi zamanǵy urys qımyldary áskerlerdi daıarlaý júıesin úzdiksiz jetildirýdi, jaýyngerlik mashyq deńgeıin arttyrýdy jáne jeke quramnyń dene daıyndyǵyn jańa jaǵdaılarǵa beıimdeýdi talap etetinin atap ótti.
Aıta ketelik aýmaqtyq qorǵanys áskerleriniń mindetine ne kiretini týraly jazǵan edik.
