Qazaqstan ashyq tústi munaı ónimderin eksporttaýǵa tyıym salýdy uzartpaq - S.Myńbaev
ASTANA. 28 jeltoqsan. QazAqparat /Rýslan Ǵabbasov/ - Qazaqstan ashyq tústi munaı ónimderin eksporttaýǵa tyıym salýdy uzartpaq. Búgin Úkimettiń selektorlyq otyrysynda sóılegen QR munaı jáne gaz mınıstri Saýat Myńbaev tıisti qaýly jobasyn qoldaýdy surady.
Onyń aıtýynsha, Qazaqstan munaı ónimderiniń osy túrlerine tyıym salýdy 2015 jylǵa deıin úsh iri munaı óńdeý zaýyttaryn jańǵyrtý aıaqtalǵansha uzartpaq. Olardy jańǵyrtýdy aıaqtaý janar-jaǵar maılarynyń barlyq túrleri boıynsha ishki naryq qajettilikterin tolyq jabatyn bolady.
Aıta keteıik, jyl boıy benzın, kerosın, dızel otynynyń eksportyna tyıym salynǵan bolatyn. Tek mazýt qana eksporttaldy. Bul shekteýge qaramastan, jaz kezinde AI- 92 markaly benzınimen qamtamasyz etýde keıbir problemalar týyndaǵan bolatyn.
