Qazaqstan arzan benzın baǵasy boıynsha reıtıngte kósh bastady

ASTANA. QazAqparat - «RIA Reıtıng» sarapshylary 2018 jylǵa arnalǵan Eýropadaǵy benzın men dızel baǵasynyń reıtıngin jarııalady. Atalǵan tizimge 33 memleket kirgen, onyń ishinde Qazaqstan da bar, dep habarlaıdy QazAqparat.

Reseılik «RIA Reıtıng»  agenttiniń saıtynda jarııalanǵan derekterge súıensek, Qazaqstandaǵy AI-95 benzıniniń baǵasy jyldyń basynda 176 teńgeni quraǵan. Bul - tizmdegi elderdiń ishinde eń tómen baǵa kórsetkishi bolyp sanalady. Ekinshi orynda - Belarýs (206,7 teńge), úshinshi - Reseı (233 teńge). Eń qymbat AI-95 benzıniniń  baǵasy Nıderlandyda (629 teńge).

Qazaqstanda bir jyldyń ishinde AI-95 20,4 paıyzǵa ósip ketken. Bul - reıtıngke qatysýshy memleketter ishindegi eń joǵarǵy jáne jyldam kórsetkish. Eýropanyń 6 memleketinde benzın baǵasynyń arzandaýy baıqalsa, 3 memlekette baǵa eshqandaı ózgeriske ushyramaǵan.

Reıtıng statıstıkasyna sáıkes, elimizdegi dızel otynynyń baǵasy 210 teńge, bul Belarýs memleketinen keıingi ekinshi oryn (208 teńge). Qazaqstandaǵy dızeldiń baǵasy bir jyldyń ishinde 25,8 paıyzǵa ósken. Jyldyq ósimdi anyqtaıtyn bul reıtıngte de eýropalyq memleketterdiń eshqaısysy bizdiń aldymyzǵa túse almady.

Reıtıngtiń taǵy bir kórsetkishi boıynsha, qazaqstandyq azamattyń ortasha jalaqysyna 853,6 lıtr benzın satyp alýǵa bolady eken. Bul kórsetkish boıynsha Qazaqstan kestede keıin qaraı jyljyp ortańǵy 16-shy orynǵa jaıǵasty. Bul ólshemde kósh bastap turǵan Lıýksembýrg turǵyndary, olar jalaqylaryna 471 teńgeden 2701 lıtr benzın satyp ala alady.