«Qazaqstan arýy» baıqaýynyń jeńimpazy aqshalaı syılyǵyn qaıda jumsaıtynyn aıtty
ASTANA. QazAqparat -«Qazaqstan arýy 2018» ulttyq baıqaýynyń jeńimpazy Alfııa Ersaıyn utyp alǵan 3 mln teńgeni qaıda jumsaıtynyn aıtyp berdi, dep habarlaıdy QazAqparat.
«Qazaqstan arýy» atanǵanyma óte qýanyshtymyn. Jeńip alǵan 3 mln teńgeni qaıyrymdylyq qoryna, balalar jáne qarttar úılerine kómek retinde berýdi josparlap otyrmyn», - dedi ol Beıbitshilik jáne kelisim saraıynda ótken baıqaýdan keıin tilshilerge bergen suhbatynda.
Budan buryn habarlanǵandaı, «Qazaqstan arýy» ataǵyna Atyraý ókili, 16 jasar Alfııa Ersaıyn laıyqty dep tanyldy. Ol búginde Atyraý gýmanıtarlyq kolledjiniń stýdenti. Aıta keteıik, «Qazaqstan arýy» baıqaýynda baq synaý úshin Astanadaǵy fınaldyq kezeńge elimizdiń túkpir-túkpirinen 30 boıjetken jınaldy. Baıqaý barysynda qazylar alqasy fınalǵa shyǵatyn tek 5 arýdy iriktedi. Olardyń arasynda Dınara Baımuratova (Semeı,17 jasta), Sabına Ázimbaeva (Almaty, 18 jasta), Maımýna Kúlkesheva (Astana, 19 jasta), Alfııa Ersaıyn (Atyraý, 16 jasta), Ekaterına Dvoretskaıa (Karaǵandy, 19 jasta) bar.
Budan keıin elimizdiń birinshi arýyn dástúrli túrde Qazaqstan halqy tikeleı efır arqyly ótkiziletin onlaın jáne SMS daýys berý arqyly tańdady. Nátıjesinde, basym daýys jınaǵan «Qazaqstan arýy-2018» baıqaýynyń jeńimpazy atandy.
Birinshi vıtse-mıss ataǵyn E. Dvoretskaıa alsa, ekinshi vıtse-mıss bolyp M. Kúlkesheva tanyldy. Úshinshi vıtse-mıss ataǵyna D. Baımuratova ıe boldy.
