«Qazaqstan Arýy-2015» jeńimpazyna tanymal qazaq dızaıneriniń qolymen jasalǵan qyz jasaýy tartý etilmek
ASTANA. QazAqparat - «Qazaqstan Arýy-2015» jeńimpazyna 5 mıllıon teńge men tanymal qazaq dızaıneriniń qolymen jasalǵan qyz jasaýy tartý etilmek. Bul týraly búgin Astanada ótken baspasóz máslıhatynda «Qazaqstan Arýy» baıqaýynyń prezıdenti Alena Rıvlına-Kyrbasova málim etti.
Aıta keteıik, baıqaý Astanada 10 jeltoqsan kúni Beıbitshilik jáne kelisim saraıynda ótedi.
Qazaqtyń dástúrli qyz jasaýy «Altyn orda» avtorlyq dızaın úıi sheberleriniń qolymen jasalǵan. Saltanatty jıyntyqqa «Mahabbat kórpesi», sandyqtar, «Bederli órnekter» shal jastyǵy, qoldan tigilgen jastyqtar, sondaı-aq dástúrli dastarqan kiredi. Osynyń barlyǵyn ulttyq dástúrdi urpaqtan urpaqqa dáripteýdi maqsat tutyp otyrǵan etno-dızaıner Yrza Tursynzada jasap otyr.
«Nege biz osyndaı syılyq jasadyq?! «Qazaqstan Arýy» baıqaýyna qatysqan qyzdardy qaraıtyn bolsaq, barlyq ýaqyttarda da oǵan az qamtylǵan kópbalaly otbasylardyń balalary kóp qatysady. Bir qazaq qyzynyń jeńimpaz atanýy arqyly, tutas bir otbasynyń ómirin ózgertkimiz keldi. Sebebi, qalaı atasaq ta, 5 mıllıon teńge kásipkerlikti ashýǵa, týǵan-týystarǵa kómektesýge, armandardy oryndaýǵa jeterlik soma emes pe», - dedi A. Rıvlına-Kyrbasova tilshilerge bergen suhbatynda.
Uıymdastyrýshynyń aıtýynsha, qyzdar osylaısha óz joldaryn tabýy yqtımal.
«Biz bıyl «Qazaqstan Arýyna» qyz jasaýyn alǵash ret bermekpiz. Analardyń barlyǵy óz qyzyna jasaý jınaıdy. Osy arqyly biz bútin bir otbasyn qoldap jibergimiz keldi. Baıqaýdyń arqasynda bir qyzdyń jasaýy daıyn bolady», - dep atap ótti ol.
