«Qazaqstan arýy-2015» baıqaýynyń jeńimpazy 5 mln. teńge ıelenedi
ASTANA. QazAqparat - «Qazaqstan arýy» konkýrsynyń jeńimpazy 5 mln. teńge ıelenetin bolady. Bul týraly búgin Ortalyq kommýnıkatsııalar qyzmetinde ótken baspasóz máslıhatynda arýlar baıqaýynyń fashion-prodıýseri Sáken Jaqsybaev málim etti.
Prodıýserdiń sózine qaraǵanda, uıymdastyrýshylar osylaısha aǵymdaǵy jyly ótetin konkýrstyń júlde qoryn arttyryp otyr. «Shyndyǵynda, bes mıllıon teńge - bul aıtarlyqtaı qomaqty qarajat, oǵan óz bıznesińdi de ashýǵa bolady, jeńimpaz úshin mansabyn jalǵastyrýǵa nemese óziniń bilimin elimizdegi, álemdegi jetekshi ýnıversıtetterde jalǵastyrýǵa da múmkindik bolady. Osynyń ózi yntalandyrýdyń ereksheligi bolsa kerek», - deıdi S.Jaqsybaev. Aıta keterligi, uıymdastyrýshylardyń aqparatyna qaraǵanda, konkýrsqa qatysý barsha qazaqstandyq názikjandy arýlar úshin tegin bolady. Eń bastysy olar Qazaqstan azamatshasy bolýy shart. «Barlyq shyǵyndar konkýrs dırektsııasynyń bıýdjetine engizilgen. Biz buny qyzdarymyzdyń barlyǵyna teńdeı jaǵdaı jasaý úshin oılastyryp otyrmyz», - deıdi ol. Eske sala keteıik, «Qazaqstan arýy-2015» 19-shy jyl saıynǵy ulttyq konkýrsy Astana qalasynda 10 jeltoqsanda ótedi. Jeńimpaz arý SMS habarlama arqyly halyqty da qatystyrý jolymen aıqyndalmaq.
