«Qazaqstan arýy-2015» baıqaýyn uıymdastyrýshylar arnaıy tosynsyılarmen qýantpaq (FOTO)

2015 jyly baıqaýdy uıymdastyrýshylar kóptegen tosynsyılar daıarlap qoıdy. Kórermender otandyq dızaınerler men ártister qatysatyn tańǵajaıyp dýmanǵa tánti bolady. Bas qoıýshy rejısser áıgili akter, prodıýser Maksım Akbarov. «Bıyl «Qazaqstan arýy-2015» baıqaýy Astananyń Beıbitshilik jáne kelisim saraıynda I LOVE ASTANA degen uranmen ótedi. Qatysýshylarǵa arnalǵan, jas ta bolsa keremet astanamyzdyń ásemdigine arnalǵan kostıýmderdiń arnaıy toptamasy jasaldy, ol - Astananyń ǵımarattary, monýmentteriniń sýretteri bar kóılekter, bul Astananyń kóriktiligin beıneleıdi. Olardy ózimizdiń otandyq dızaınerler daıyndaıdy. Nómirlerdiń bireýi Qazaqstan halyq Assambleıasymen baılanysty. Áserli ári kóńil kóteretin dýman bolady», - dep bólisti Maksım Akbarov. Іs-sharany Qazaqstandaǵy telejúrgizýshi Dınara Sátjan jáne akter Táýekel Músilim júrgizedi. «Osyndaı sulýlyq merekesiniń bir bólshegine aınalaryma óte qýanyshtymyn. Qatysýshylardyń bárine kúsh-qýat, tózimdilik tileımin. Sizder úshin bul baıqaý esten ketpeıtin oqıǵalardyń biri bolsyn. Barshańyzǵa sáttilik!», - dedi Músilim. Dýmannyń meımandary halyqaralyq baıqaýlardyń laýreaty «Rin'go» jáne reseılik «Basty sahna» shoýyna qatysýshylar - «The Jigits». Al «Slavıanskıı bazar-2015» baıqaýynyń jeńimpazy Dımash Qudaıbergenov jáne «Jańa tolqyn-2015» baıqaýynyń laýreaty Ádemi halyqaralyq arenada jeńiske jetelegen ánderin shyrqamaq. Sondaı-aq Ádemi Renat Ǵaısınniń ózine arnap jazǵan «Qustar» kompozıtsııasyn oryndap beredi. «Arýlardyń bárine ózderińe senimdi bolyńdar degim keledi, batyldyq pen kúızeliske tótep berer tózimdilik tileımin. Bul qasıetter bolmasa, baıqaýlarda baq synaý óte qıyn. Óz basym ylǵı jeńiske jetetinime senimdi bolamyn, meniń artyqshylyǵym da osy. Sulýlarymyzǵa tek sáttilik tileımin. Osy arýlarymyzdyń arqasynda bizdiń keremet elimizdi kúlli álem biletin bolady», - dep bólisti Dımash Qudaıbergenov. Tıtýly bar qatysýshylar 20 qarashada elordada bas qosyp, aqtyq dýmanǵa daıyndyqty bastaıdy. Olar úshin «Sulýlyq pen qaıyrymdylyqtyń úılesimi!» degen uranmen ótkiziletin áleýmettik, sporttyq, qaıyrymdylyq is-sharalar josparlanǵan. 2015 jyly jeńimpazǵa arnalǵan aqshalaı júlde bes mıllıon teńge kóleminde bolady dep bekitilgenin atap ótken jón. Jeńimpaz aqshalaı júldemen qatar «Altyn Orda» avtorlyq dızaın úıi sheberleriniń qolymen jasalǵan qazaqtardyń dástúrli etnojasaýynyń ıegeri atanady. «Shyǵys rapsodııasy» toptamasy qazaq halqynyń salt-dástúrin qolóner «tilinde» aıqyn kórsetken. Toptamaǵa «Mahabbat kórpesi» jıyntyǵy, sandyqtar, «Bederli órnekter» jastyǵy, sondaı-aq dástúrli dastarhan kiredi. Bul dúnıeniń bárin ulttyq salt-dástúrdi jańǵyrtýǵa bel býǵan dızaıner Yrza Tursynzada usynyp otyr.