«Qazaqstan arýy» sulýlyq baıqaýynda jasqa baılanysty shekteý alynyp tastaldy

ALMATY. KAZINFORM – «Qazaqstan arýy» ulttyq sulýlyq baıqaýynda jasqa baılanysty shekteý alynyp tastaldy. Endi oǵan 18 jastan asqan barlyq boıjetken úmitker bola alady.

«Bıyl «Qazaqstan arýy» ulttyq sulýlyq baıqaýy halyqaralyq konkýrstardyń jańashyldyǵyn qoldap, qatysýshylarǵa qoıylǵan jasqa baılanysty shekteýlerdi alyp tastaý arqyly tarıhı qadam jasady. Endi baıqaýǵa kámelettik jasqa tolǵan, qatysýǵa nıeti bar barlyq arý baǵyn synaı alady. Jas shekteýge qatysty tolyq aqparatty kastıng bóliminen anyqtaýǵa bolady», - deıdi uıymdastyrýshylar.

Qalǵan sharttar ózgerissiz qalady: qatysýshylardyń boıy 165 sm-den kem emes, turmys qurmaǵan jáne balasy bolmaýy kerek, sondaı-aq Qazaqstan azamatshasy bolýy da mindetti. «Qazaqstan arýy» ulttyq sulýlyq baıqaýy búginde ıntellekt, mádenıet jáne basqa adamdarǵa kómektesý qundylyqtaryn nasıhattaıtyn alań. Baıqaý «Álem arýy», «Ǵalam Arýy» jáne «Jer arýy» halyqaralyq baıqaýlarynyń biregeı lıtsenzıaty.

Bul «Qazaqstan arýy» ulttyq sulýlyq baıqaýynyń jeńimpazdary óz elin dúnıejúzilik arenada tanytýǵa, óz Otanynyń dańqyn álemge pash etýge biregeı múmkindik alady degen sóz. Dál qazirgi ýaqytta «Qazaqstan arýy» jańa maýsymyna qatysý úshin kastıng jalǵasyp jatyr. Baıqaýdyń bıylǵy basty taqyryby - «The art of being a woman» («Áıel bolý óner»). Atalǵan taqyryp názik jandylardyń sulýlyǵy men talantynyń jan-jaqtylyǵyn kórsetedi, qatysýshylardy shyǵarmashylyq áleýetin barynsha arttyrýǵa shaqyrady.

«Mysaly, 2022 jylǵy jeńimpaz Tomırıs Kakımova bıyl naýryz aıynda Úndistanda ótken «Álem arýy» halyqaralyq baıqaýynda Qazaqstandy laıyqty túrde tanystyrdy. «Qazaqstan arýy-2022» baıqaýynyń taǵy bir jeńimpazy Dılnaz Tılaeva álemdik «Jer arýy 2023» baıqaýynyń úzdik 8 fınalıstiniń qataryna enip, Vice Miss atandy», - dep atap ótti uıymdastyrýshylar.

2023 jyldyń jeńimpazdary Sabına Ydyrysova, Madına Álmuhanova jáne Aıaýlym Álimhalıeva bıyl álemdik baıqaýlarǵa barady. Qazir joǵary daıyndyq ústinde.