«Qazaqstan arýy – 2023» baıqaýynyń jeńimpazy anyqtaldy
Almatyda «Qazaqstan arýy – 2023» ulttyq sulýlyq baıqaýy aıaqtaldy. Baıqaýda bas júldeni 21 jastaǵy Sabına Ydyrysova jeńip alyp, osy jyldyń «Qazaqstan arýy» atandy, dep habarlaıdy Kazinform.
Bıylǵy baıqaý ekologııany qorǵaý aıasynda «Bolashaqty aıala» - «Zaşıtı býdýşee» uranymen ótti. Baıqaýdyń fınaldyq kezeńine kastıngterden jáne jartylaı fınaldyń nátıjesinde iriktelip shyqqan 25 qyz qatysty. Olardyń arasynda óńirlik irikteý kezeńderiniń jeńimpazdary da boldy.
Baıqaýǵa qatysýshy arýlarǵa kelesideı negizgi talaptar qoıyldy: jastary 18-25 arasynda bolýy, boılary 165 sm-den kem bolmaýy, QR azamaty, turmys qurmaǵan ári balaly bolmaýy tıis.
Baıqaýǵa baǵa beretin ádilqazylar quramynda: «Qazaqstan arýy» ulttyq sulýlyq baıqaýynyń prezıdenti Aıdaı Isaeva, «Qazaqstan arýy – 2022» baıqaýynyń jeńimpazy Tomırıs Kakımova, sportshy ári akter Erkebulan Toqtar, bloger, aktrısa Janııa Djýrınskaıa, qyrǵyz dızaıneri Arzýbek Vonama, kásibı model Anjela Peresypkına boldy.
Fınaldyq kezeń birneshe baıqaýdan turdy. Qatysýshylar túrli kıimder men beınelerde jeke jáne toptyq defıle kórsetti, keıin suraqtarǵa jaýap berdi. Ádilqazylar aldymen 25 qatysýshynyń ishinen top-12 qyzdy anyqtady, osydan keıin eń úzdik 5 qyzdy anyqtady.
«Qazaqstan arýy» ataǵy men «Álem arýy» baıqaýyna joldamany 21 jastaǵy Sabına Ydyrysova jeńip aldy. Oǵan sondaı-aq 5 mln teńgeniń sertıfıkaty tabystaldy.
«Qazaqstan ǵalam arýy» táji men «Álem arýy» baıqaýyna joldama 23 jastaǵy Madına Álmuhanovaǵa berildi.
«Qazaqstan jer arýy» ataǵy men «Jer arýy» baıqaýyna joldama 20 jastaǵy Aıaýlym Alımhalıevaǵa berildi.
Botagóz Nurjigitova «Qazaqstan vıtse-arýy – 2023» atandy.
Saıtta daýys berý arqyly kórermen kózaıymy syılyǵynyń ıegeri Adelına Bagýmbaeva boldy.
Eske salsaq, ótken jyly 24 jastaǵy astanalyq Tomırıs Kákimova «Qazaqstan arýy» atanǵan edi.
