Qazaqstan artylǵan elektr energııany shetelge satýy múmkin
ASTANA. QazAqparat - Qazaqstanda elektr energııasyn shyǵaratyn uıymdarǵa artyq energııany syrt memleketterge satýǵa ruqsat berý jaıy qarastyrylýda. Bul týraly búgin Parlament Májilisinde "Energetıka máseleleri týraly" zań jobasyn talqylaýǵa arnalǵan dóńgelek ústelde "KEGOK" AQ texnologııalyq damý boıynsha atqarýshy dırektory Áskerbek Qýanyshbaev málim etti, dep xabarlaıdy QazAqparat.
"Elektr energııasyna shekti tarıfter engizilgennen bergi 7 jyl ishinde kóp is atqaryldy. Salaǵa trıllıon teńgege tarta ınvestıtsııa salyndy. Qazir Qazaqstanda 20 myń megavatt qýattylyq tirkelse, onyń ishinde 3 myń megavatt elektr energııasy profıtsıt bolyp sanalady", - dedi ol.
Onyń sózinshe, bul profıtsıt áli 2026-2027 jyldarǵa deıin saqtalady.
"Óz kezeginde, atalmysh zań jobasynyń 13-babynda bylaı delingen: Energııa óndirýshi uıym QR Biryńǵaı elektroenergetıkalyq júıede elektr energııasynyń proıfıtsıti kezinde elektr energııasyn Qazaqstannan tys memleketterge QR tutynýshylary satyp alatyn baǵadan kem emes deńgeıde satýǵa quqyly", - dep túsindirdi Áskerbek Qýanyshbaev.
