Qazaqstan ártistik júzýden álem kýbogy kezeńinde ekinshi júldesin jeńip aldy
ASTANA. KAZINFORM – Frantsııanyń Parıj qalasynda ártistik júzýden álem kýbogynyń ekinshi kezeńi jalǵasyp jatyr.
Atalǵan týrnırde Qazaqstan quramasy ekinshi medalin enshiledi.
Ulttyq olımpıadalyq komıtettiń málimetinshe, aralas dýetter arasyndaǵy (tehnıkalyq baǵdarlama) jarysta ıAsmın Islamova men Aldııar Ramazanov 211.1267 upaı jınap, ekinshi orynǵa ıe boldy.
Birinshi oryndy 231.9159 upaımen Reseı ókilderi Alına Rýmıantseva men Zahar Trofımov jeńip aldy. Al, qola júlde 207.9975 upaı jınaǵan kolýmbııalyq Emılı Mınante men Gýstavo Sancheske buıyrdy.
Aıta keteıik, Qazaqstan quramasynyń enshisinde endi eki medal bar. Buǵan deıin Vıktor Drýzın qola júldege qol jetkizgen edi.
