«Qazaqstan» arnasyndaǵy sheteldik telehıkaıalardyń ýaqyty úsh ese qysqarady
ASTANA. 1 qarasha. QazAqparat - «Qazaqstan» ulttyq arnasyndaǵy telehıkaıalardyń efırlik ýaqyty birte-birte azaıatyn bolady. Bul týraly búgingi baspasóz máslıhatynda «Qazaqstan» respýblıkalyq teleradıo korporatsııasy basqarma tóraǵasynyń birinshi orynbasary Lázzat Júnisova málim etti.
Onyń habarlaýynsha, qazirgi kezde sheteldik hıkaıalardyń efırlik ýaqyty 4 saǵattan asady. «Endi biz ony úsh ese, ıaǵnı 1 saǵat 40 mınýtqa deıin qysqartatyn bolamyz. Osylaısha, «Qazaqstan» ulttyq telearnasyndaǵy sheteldik telehıkaıalardyń efırlik ýaqyty birden 7 paıyzǵa tómendeıdi», - deıdi L. Júnisova.
Basqarma tóraǵasynyń birinshi orynbasary atap kórsetkenindeı, sheteldik telehıkaıalardyń efırlik ýaqytyn qysqartýdyń arqasynda aǵymdaǵy jyldyń sońyna deıin 60 mln. teńge, al kelesi jyly 140 mln. teńge únemdeýge bolady. Ol aqshanyń barlyǵy otandyq telehıkaıalar men baǵdarlamalardy shyǵarýǵa jumsalady.
