«Qazaqstan» arnasynda Jalǵyzbasty ákeniń dramalyq hıkaıasy kórsetiledi
ASTANA. QazAqparat - «Qazaqstan» arnasynda 5-6 naýryzda kórermen kóńilinen shyǵatyn «Áke» atty 12 serııaly áserli telehıkaıa kórsetiledi.
Fılmniń oqıǵasy óz ómirine ózgeris engizip, ári balalarynyń tárbıesimen aınalysý úshin aýyldan qalaǵa kelýge májbúr bolǵan jalǵyzbasty ákeniń ómirindegi eń aýyr kezeńder jaıynda bolmaq.
Áıelinen aıyrylǵan Talǵat eki balamen jalǵyz qalady. Aıdana esimdi qyzy 17 jasta, uly Sábıt 16 jasta. Analary balalar bastaýysh synypta oqyp júrgende qaıtys bolǵan. Balalarynyń jaqsy bilim alyp, beıǵam ómir súrýi úshin Talǵattyń birneshe jumysta qatar isteýine týra keledi. Degenmen jumysynyń kóptiginen ol balalarynyń tárbıesine onsha kóńil bóle almaıdy.
Balalary ósip, jetilgen soń baryp Talǵat ómirinde óte qıyn kezeń bastalǵanyn túsinedi. Qyzy bımen aınalysqysy keledi jáne ákesine eskertpesten bı ýchılışesine oqýǵa túsedi. Al uly ákesimen tipti sóılespeıdi de. Ol anasynyń ólimine ákesin kinálap, osy úshin ákesin keshire almaıdy.
Talǵat bolsa, ulynyń ózine degen mahabbaty men syılastyq qarym-qatynasyn qaıtarýǵa bar kúsh-jigerin jumsaıdy. Sábıt mektepte jergilikti buzaqylarmen baılanysady. Biraq balasymen qansha túsiniseıin dep talpynǵanymen, budan eshteńe shyǵara almaıdy.
Qyzy bolsa bı sabaǵy kezinde aıaǵynan jaraqat alady. Bul da kóp shyǵyndy qajet etedi. Talǵat balalarynyń joqshylyqta ómir súrmeýi úshin nesıe alyp, qaryzǵa belshesinen batady.
Sonymen qatar Talǵat balalaryna ana ózine jaqsy jar bolatyn jandy tabýǵa tyrysady. Ol áıeldermen tanysyp, kezdesken saıyn ondaı adamdy tabý ońaıǵa soqpaıtynyn túsinedi. Biri qyzyna unamasa, endi biri áıel balalardy unatpaıdy.
Kóp serııaly drama «Qazaqstan» teleradıokorporatsııasynyń tapsyrysy boıynsha «567 creative laboratory» JShS-men túsirildi.
Kınotýyndynyń avtory men rejısseri Asqar Uzaqbaev, basty rólderdi Azat Seıtmetov (áke), Álıhan Baısultan (balasy), Juldyz Ánýarova (qyzy) oryndaıdy.
