«Qazaqstan» arnasynda EURO-2016 jerebe tartý rásimi kórsetiledi
ASTANA. QazAqparat - 12 jeltoqsan kúni saǵat 23.00-de «Qazaqstan» ulttyq telearnasynyń tikeleı efırinde Parıjde ótetin 2016 jylǵy Eýropa chempıonaty fınaldyq kezeńiniń jerebe tartý rásimi kórsetiledi. Translıatsııa 13 jeltoqsan kúni saǵat 10.25-te «Kazsport» telearnasynda qaıtalanady, dep habarlady «Qazaqstan» RTRK» AQ baspasóz qyzmeti.
Bul kúni Eýropa chempıonatyna qatysatyn komandalardyń bolashaq qarsylastary anyqtalady. 15-shi Eýropa chempıonaty 2016 jyldyń 10 maýsymy men 10 shildesi aralyǵynda Frantsııanyń 10 qalasynda ótedi. Fınaldyq týrnırde alǵash ret 24 komanda oınaıdy.
«Qazaqstan» RTRK» AQ EURO-2016 týrnıri translıatsııasyn Qazaqstan Respýblıkasynyń aýmaǵyna eksklıýzıvti taratý quqyǵyna ıe. Korporatsııa Eýropa chempıonatyn keń kólemde kórsetýdi josparlaýda. Barlyq matchtar «Qazaqstan» jáne «Kazsport» telearnalarynyń tikeleı efırinde kórsetiledi. Sonymen qatar, týrnır jaıly «Road to France» 15 arnaıy jobasy kórsetiledi. Atalmysh 15 fılmniń úsheýi - korporatsııanyń óz ónimi bolady.
Eýropa chempıonaty taqyryby «Qazaqstan» jáne «Kazsport» telearnalaryndaǵy «Tańsholpan», «Búgin jeksenbi», «Sport.kz» baǵdarlamalary jáne basqa jobalary aıasynda qamtylmaq. Birinshi ret atalmysh shara korporatsııanyń 14 aımaqtyq arnalarynda keń kólemdegi aqparattyq súıemeldeýge ıe bolady.
