«Qazaqstan» arnasy kórermen nazaryna «Áke» telehıkaıasyn usynbaq
ASTANA. QazAqparat - «Qazaqstan» arnasy kórermender nazaryna 12 bólimnen turatyn «Áke» atty televızııalyq kórkem telehıkaıasyn usynady, dep habarlady Ulttyq arnanyń baspasóz qyzmetinen.
Fılmniń mazmuny jalǵyzbasty ákeniń ómiri týraly órbıdi. Jarynan aıyrylǵan jalǵyzbasty áke qyzy men ulyn ertip, aýyldan Almatyǵa kóship keledi. Balalarynyń bolashaǵyna alańdaǵan ol qalada jaqsy jumysqa ornalasyp, úlken múmkindikter men baqytty ómirge qol jetkizýge bolady dep senedi.
Balalaryn qatarynan kem qylmaı oqytyp, olardyń úlken ómirge durys qadam basýyna kómekteskisi keledi. Biraq, balalary qala ómirine beıimdele qoımaıdy. Ákeleri ózine ońtaıly jumys izdep, kóp qınalady. Ómirdiń qadam basqan saıyn aldyńnan shyǵa keletin san túrli qıyndyqtaryna shydas berýge ákeniń kúshi jete me? Ákelerine degen balalyq mahabbaty sónýge aınalǵan sátte baýyr eti balalarynyń ózine degen kirshiksiz mahabbaty men senimin keri qaıtarý jolynda áke qandaı táýekelderge barady?
Serıalda osy máseleler qozǵalmaq. Serıal kórermenderge naýryz aıynda jol tartady. Stsenarıı avtory - Asqar Uzabaev, Sergeı Lıtovchenko, Saltanat Muhtarova. Qoıýshy rejısseri - Asqar Uzabaev. Akterlar - Azat Seıtimetov, Juldyz Ánýarova, Álıhan Baısultan.
