«Qazaqstan» arnasy Qanat Islamnyń 21-jekpe-jegin tikeleı efırde kórsetedi
ASTANA. QazAqparat - «Qazaqstan» Ulttyq arnasy otandasymyz Qanat Islamnyń kásipqoı bokstaǵy 21-jekpe-jegin tikeleı efırde kórsetýdi josparlaýda. Bul týraly «Qazaqstan» RTRK» AQ baspasóz qyzmetinen habarlady.
Kásipqoı boks áleminde «Qazaq» atymen tanylǵan Islamnyń bul jolǵy qarsylasy 28 jastaǵy kolýmbııalyq bylǵary qolǵap sheberi Hýan De Anhel. Basty kezdesýi Islam men De Anhel arasyndaǵy jekpe-jek bolyp tabylatyn reıtıngtik boks keshi 9 mamyr kúni AQSh-tyń Florıda shtatyndaǵy Leıklend qalasynda Astana ýaqytymen tańǵy 07:00-de bastalmaq.
Kásipqoı boksqa 2012 jyly aýysqan Qanat Islam buǵan deıingi ótkizgen 20 jekpe-jeginiń barlyǵynda jeńiske jetken. Onyń ishindegi 17 kezdesýde otandasymyz qarsylastaryn nokaýtqa túsirgen.
Al Hýan De Anhelge keler bolsaq, kolýmbııalyq boksshy 2008 jyldan kásipqoılar arasyndaǵy syndarǵa qatysyp keledi. Sharshy alańda 22 jekpe-jek ótkizip 18-in óz jeńisimen aıaqtaǵan. Úsheýinde De Anheldiń qarsylastary basym tússe, bir kezdesý (Hýannyń kásipqoı rıngtegi alǵashqy jekpe-jegi) teń nátıjemen aıaqtalǵan.
Qarsylasynyń kásipqoı rıngtegi tájirıbesi mol desek te, Islamnyń mektebi jaqsy. Ári, otandasymyz áýesqoılar arasyndaǵy syndarda tolaǵaı tabystarǵa qol jetkizgen biregeı tulǵalardyń biri.
Qytaıda dúnıege kelgen Qanat Aspan asty eliniń atynan eki ret Olımpıada oıyndaryna qatysyp, 2008 jyly Beıjiń qalasynda ótken jazǵy oıyndarda qola júldege qol jetkizdi. Islamnyń álemge keńinen tanylǵan kezi de sol Olımpıadamen tuspa-tus keledi.
2011 jyly atajurty - Qazaqstanǵa oralǵan Qanat sol jyly qurylǵan Búkilálemdik boks serııasyndaǵy (WSB) ataqty Astana Arlans komandasyna qabyldanyp, otandastaryn rıngtegi jarqyn ónerimen qýantady.
Búginde Qanat Amerıka Qurama Shtattarynda jattyǵady. Bapkeri - tanymal amerıkalyq maman Nelson Lopes. De Anhelge qarsy jekpe-jek - Qanattyń kásipqoı bokstaǵy keń aýqymdy telearna kórsetetin alǵashqy kezdesýi.
Otandasymyzǵa sáttilik tileımiz!
