Qazaqstan armııasynyń ıdeologtary
ASTANA. Qańtardyń 19-y. QazAqparat - Qazaqstan Qarýly kúshteriniń tárbıeleý qurylymdarynyń ofıtserleri búgin komandırdiń tárbıe jáne áleýmettik-quqyqtyq jumys jónindegi orynbasarlary ınstıtýtynyń qurylýynyń 17 jyldyǵyn atap ótýde.
Atalmysh qyzmet Qazaqstan Prezıdentiniń 1993 jyly qańtardyń 19-yndaǵy Jarlyǵymen qurylǵan bolatyn, dep habarlady qorǵanys vedomstvosynyń baspasóz qyzmetinen.
«Tárbıeshi-ofıtserdiń basty maqsaty - adamdarmen jumys isteý. Olar qolyna qarý ustaǵan sarbazdyń adamdyq tulǵasyn kóre bilýi, ony túsinýi jáne onymen senimdi qarym-qatynas ornata bilýi kerek. Jeke quramnyń joǵary moraldyq-psıhologııalyq ahýaly da, qazaqstandyq patrıotızmniń ósýi de tárbıeshi-ofıtserge baılanysty»,- deıdi Qorǵanys mınıstrligi Tárbıe jáne áleýmettik-quqyqtyq jumystar departamentiniń bastyǵy Qaırat Myńjanov.
Keńes armııasynda bul ofıtserler ár jyldary ár túrli atalyp keldi. Olar - komıssarlar, polıtrýkter, zampolıtter, tárbıeshiler dep ataldy. Biraq olardyń negizgi jumystary: Otan qorǵaý úshin qajetti jaýyngerlik rýhty nyǵaıtý, áskerı qyzmetkerlerdi tárbıeleý, jaýyngerlerdiń boıynda moraldyq jáne jaýyngerlik qasıetterin qalyptastarý jáne áskerı tártipti qataıtý boldy.
