Qazaqstan armııasynyń bedeli joǵary
ASTANA. QazAqparat - 7 mamyr - Táýelsiz Qazaqstan tarıhyndaǵy erekshe kún. Osydan 25 jyl buryn Elbasy Nursultan Nazarbaevtyń Jarlyǵymen elimizdiń Qarýly Kúshteri quryldy. Sodan beri bul kún - Otan qorǵaýshylar kúni bolyp merekelenip keledi.
Táýelsiz eldiń tynyshtyǵyn saqtaıtyn Qarýly Kúshterdiń qalyptasýy úshin 25 jyl kóp ýaqyt emes. Osy jyldar ishinde Elbasy, Joǵarǵy Bas qolbasshy Nursultan Nazarbaevtyń tikeleı basshylyǵymen joǵary jaýyngerlik ázirliktegi armııa quryldy deýge tolyq negiz bar. Áskerimiz aıbyndy. Qorǵanys ónerkásibiniń damýy qarqyndy. Áskerı qyzmetkerlerdiń turmysy jaqsy: jalaqysy joǵary. Olardy baspanamen qamtýdy da memleket mindetine alyp otyr.
Bıylǵy Otan qorǵaýshylar kúni Qazaqstan Qarýly Kúshteriniń 25 jyldyǵymen tuspa-tus keldi. Osy mereıli mereke kúnine oraı ótkizilgen parad elimizdiń áskerı áleýetin aıshyqtap kórsetti. «Qazaq eli» alańynda sap túzegen áskerıler men barsha qazaqstandyqtardy Elbasy Nursultan Nazarbaev Qazaqstan Respýblıkasy Qarýly Kúshteriniń 25 jyldyǵy jáne Ekinshidúnıejúzilik soǵystaǵy Jeńistiń 72 jyldyǵymen quttyqtady.
Memleket basshysy bıyl el táýelsizdigi tarıhyndaǵy eń aýqymdy parad ótkizilip otyrǵanyn, sondaı-aq Qazaqstan armııasy qalyptasýdyń laıyqty jolynan ótkenin jáne onyń bedeli joǵary ekenin atap ótti.
«Paradqa bes myńnan astam adam jáne 400 áskerı tehnıka qatysty. Bul aıbyndy armııamyzdyń dańqy asqaq jáne maqtan tutýǵa turarlyq ekenin kórsetedi. Osy jyldarda memleket áskerılerge jan-jaqty qoldaý bildirip keledi. Alǵashqy áskerı qurylymdardan bastap qaýipsizdiktiń tıimdi júıesin qurýǵa deıingi aýqymdy joldan óttik. Memlekettiń qalyptasýynyń kúrdeli kezeńinde Qazaqstan armııasy óziniń aldyna qoıylǵan mindetterdi abyroımen atqara bildi. Qarýly Kúshterimiz el ishinde jáne shetelde joǵary bedelge ıe boldy», - dedi Qazaqstan Prezıdenti.
Budan bólek, Memleket basshysy armııany jańǵyrtýdyń basymdyǵy bar baǵyttaryna toqtalyp, ony ári qaraı damytý mindetterin anyqtap berdi.
«Búgin Qarýly Kúshter elimizben birge jańǵyrýdyń tarıhı kezeńin bastan ótkerýde. Terrorızmmen kúres barlyq kúsh qurylymdary qyzmetiniń múlde jańa baǵyty. Qazaqstan armııasy saqadaı saı bolyp, kez kelgen qaýip-qaterge daıyn turýǵa tıis. Taǵy bir negizgi mindet - jeke quramdy nyǵaıtý. Biz áskerı qyzmetshilerdiń jańa býynyn tárbıeleýdemiz. Áskerı kıim kıgen adamdar minsiz abyroı men ádildiktiń etalony, bolashaq urpaqtar úshin úlgi bolýǵa tıis. Merekelik paradqa Qarýly Kúshterimizdiń rezervi bolyp sanalatyn «Jas ulan» áskerı mektepteri kýrsanttarynyń tuńǵysh ret qatysyp otyrǵany kezdeısoq emes. Bul - armııa dástúri men qundylyqtar sabaqtastyǵynyń jarqyn belgisi», - dedi Nursultan Nazarbaev.
Qazaqstan Prezıdenti búgingideı beıbit ómir syılap, táýelsiz ári myqty memleket qurýǵa jol ashqany úshin Uly Otan soǵysynyń ardagerlerine alǵys aıtty.
Sondaı-aq, Memleket basshysy Qazaqstanda beıbitshilik pen turaqtylyqty saqtaýdyń mańyzdylyǵyna toqtalyp, Otanymyzdyń qaýipsizdigin tek armııa ǵana emes, elimizdiń barlyq azamattary da oılaýǵa tıis ekendigin atap ótti.
«Biz barlyq kórshilerimizben dospyz jáne «Beıbit bir ǵana kelisim júz jeńisten artyq» degen ónegeli ósıetti este ustaýymyz kerek. Sondyqtan basty qundylyqtarymyz - beıbitshilik, kelisim jáne birlik dástúrin urpaqtan-urpaqqa jalǵastyryp kelemiz. Qarýly Kúshter árqashan da táýelsizdigimizdiń basty tiregi bolyp qala beredi», - dedi Nursultan Nazarbaev.
Áskerı paradty tamashalaýǵa jınalǵan jurtshylyq túrli áskerı qurylymdardyń sardarlary men sarbazdarynyń saltanatty marshyn, san alýan tehnıkalardy jáne aspan keńistiginde sheberligin kestelegen ushaqtardy kórip, kóńilderi kókke kóterilgendeı áser alyp jatty.
