Qazaqstan armııasynyń áskerı qabileti jyl ótken saıyn artyp keledi - Elbasy
ASTANA. Mamyrdyń 7-si. QazAqparat /Ernur Aqanbaı/ - Qazaqstan armııasynyń áskerı qabileti jyl ótken saıyn artyp keledi.
Búgin, mamyrdyń 7-si Otan qorǵaýshy kúni Aqordada birqatar áskerı qyzmetshige joǵary áskerı shender men arnaýly ataqtardy tapsyrý rásiminde QR Prezıdenti-QR Qarýly Kúshteriniń Joǵarǵy Bas qolbasshysy Nursultan Nazarbaev osylaı málimdedi, dep habarlaıdy QazAqparat.
«Qazaqstannyń qazirgi armııasy jeńimpaz armııanyń (Keńes Odaǵynyń-red.) úzdik áskerı dástúrin laıyqty jalǵastyrýshy bolyp tabylady. Qazaqstannyń joǵary qorǵanys qabiletin qamtamasyz etý bizdiń ulttyq qaýipsizdigimizdiń mańyzdy basymdyǵy bolyp tabylady. Osy mańyzdy mindetti oryndaý úshin memleket tarapynan armııany jabdyqtaýda, jeke quramdy qamtamysyz etýde, generalıtetti jáne ofıtserlerdi qoldaýda, kadrlardy daıarlaýda qyrýar jumystar jasalýda. Sondyqtan da, qazirgi tańda memleketten bólek armııany qalyptastyrýda jáne úıretýde bizdiń armııanyń ofıtserleri men generaldarynyń joǵary quramy, mamandar mańyzdy ról atqarady. Ótken oqý-jattyǵýlar bizdiń armııanyń áskerı qabiletiniń, bizdiń qyzmetterdiń jabdyqtalýynyń artyp kele jatqanyn kórsetip otyr. Osyny eskere otyryp búginde Qarýly Kúshterdiń basshylyq quramynyń úlken toby generaldyq pogondar alyp otyr. Osylaısha kásipqoılardyń eren eńbegin, aldyǵa qoıǵan maqsatqa qol jetkizýdegi tabandylyǵyn, qajyrlyǵyn, qyzmetin óteýdegi tabystaryn Otany joǵary baǵalaýda», dedi N. Nazarbaev.
Osy oraıda Memleket basshysy Qazaqstan Qarýly Kúshteriniń basshylyq quramynyń Qazaqstan armııasynyń áskerı sheberligin jaqsartý isindegi eńbekterin joǵary baǵalady. «Qarýly Kúshterdiń Joǵarǵy Bas qolbasshysy retinde men Sizderdi budan bylaı da barlyq kúsh-jigerlerińizdi, bilimderińizdi jáne tájirıbelerińizdi eldiń qorǵanys qabiletin jan-jaqty damytýǵa, Qazaqstan armııasynyń jedel áskerı daıyndyǵyn arttyrýǵa jumsaýǵa shaqyramyn», dedi Prezıdent.
Sonymen qatar, Elbasy bizdiń eldiń barlyq quqyq qorǵaý organdarynyń Otanymyzdyń qaýipsizdigin qamtamasyz etýdegi qyzmetin joǵary baǵalady. «Memleket bizdiń Qarýly Kúshterimizdi, quqyq qorǵaý júıesin nyǵaıtýǵa jyl saıyn kóp kóńil bólip keledi. Áskerge qarý-jaraqtyń, áskerı tehnıkanyń zamanaýı úlgileri kelip túsýin jalǵastyrýda, áskerı qyzmetshilerdi áleýmettik qorǵaý máselesi kezeń-kezeńimen sheshilip jatyr. Bul sharalar táýelsiz Qazaqstannyń Qarýly Kúshteriniń daıyndalǵan, Otanǵa berilgen zamanaýı kásibı armııa retindegi odan ári qalyptasýyna yqpal etetindigine senimdimin», dedi Prezıdent.
