Qazaqstan armııasynda sýıtsıd eki esege azaıdy
Bul týraly Almaty oblysynyń áskerı aktıvimen kezdesý barysynda Qazaqstan Respýblıkasynyń bas áskerı prokýrory Erǵalı Merzadınov habarlady.
«Osy jylǵy 8 aıda QR Qarýly kúshteri qatarynda óz-ózine qol jumsaýdyń 11 oqıǵasy tirkeldi. Ótken jyldarmen salystyrǵanda olardyń sany eki esege derlik tómendedi. Merzimdi áskerı qyzmetin óteýshiler arasynda sýıtsıd múldem joq deýge bolady. Jarǵyǵa saı emes qarym-qatynastar negizinde óz-ózine qol jumsaý oqıǵalary bolǵan joq. Tirkelgen qylmystyq quqyqbuzýshylyqtardyń jalpylaı tómendeýi baıqalýda», - dedi Merzadınov.
Sondaı-aq otyrys barysynda áskerı qyzmetshilerdi áleýmettik qoldaý, atap aıtqanda turǵyn úımen qamtamasyz etý máseleleri qozǵaldy. Óńirlerge qyzmetke kelgenderdiń barlyǵyna birdeı qyzmettik páterler berilmeıdi. Odan bólek, páterdi jaldaǵany úshin ótemaqy tólenbeıtin jaǵdaılar da bolady.
Negizgi problemalardyń biri, ótemaqyny tóleý kezinde turǵyn úıdi jaldaý kelisimshartyn usyný qajet. Alaıda, jalǵa berý kelisimsharty barlyq eldi mekenderde jasala bermeıdi.
Sondaı-aq áskerı prokýror ásker - bul erekshe qurylym ekenin jáne ol úlgi bolýy tıistigin atap ótti.
«Biz qylmystyq buzýshylyqtarǵa jol bermeýimiz qajet», - dedi general.
